Leyla Guvene 8ê Teşrîna peyêne ra nata grevê vêşanîye yê bêdem-bêagêrayîşî de ya. Halê weşîye ya Leyla Guvene çend şino beno xirab.

Ame zanayene ke rîyê problemanê weşîye ra Guvene şeş rojî yê ke avûkatanê xo dir nêeşkena pêvînayîş virazo. Avûkatî her roje şinê Zîndanê Tîpê Eyî yê Amedî û waştişê pêvînayîşî kenê, la Guvene seba ke enerjîya viraştişê pêvînayîşî xo dir nêvînena nêeşkena şiro pêvînayîş.

Guvene dir problemê weşîye yê sey bênîzamîya tansîyone, viritiş, bêhalî, dejayîşê serreyî, krampê madeyî, hemverê veng û roşinî de zêde hesasbîyayîş virazîyayê. Guvene tewr peynî 7ê Çile de keynaya xo Sabîha Temîzkane û lajê ci yo ke teberê welatî de ciwîyeno dir qasê saetêk pêvînayîş viraştibi.                 

Amebi vatene ke Guvene bi hetkarîya embazanê xo yê koxuşe şîyêne odeya pêvînayîşî. Temîzkane vatibi goreyê pêvînayîşanê verênan pêvînayîşê peyênî de maya ci hîna bêhal bîya û kîlo kerda vîndî.