Endamê Konseya Merkezî yê TTB‘yî Dr. Halîs Yerlîkaya’yî bale ante weşîya Leyla Guvene ser û va: “Grevê vêşanîye yê Guvene kewt roja 84’ine û seba ke zaf kesî yenê zîyaret, rîskê enfeksîyonî zêde yo û ganî bêro dîqetkerdene.“

Hemsereka KCD‘yî û parlamentera HDP‘yî Leyla Guvene, seba ke tecrîdê serê Rayberê Şarê Kurdî Abdullah Ocalanî bêro wedaritene 7’ê Kanûne ra nat grevê vêşanîye de ya û grev kewt roja xo ya 84’ine. Guvene 25’ê Çele de ameye tehlîyekerdene. Guvene çalakîya xo keye de domnena û hetê weşîye ra rewşa xo başe nîya. Êdî nêeşkena awe bişimo, madeyê xo xereqîno û hetê sîstemê pawitişê wucûdî ra xetere de ya. Endamê Konseya Merkezî yê TTB’yî (Yewîya Tabîbabê Tirkîya) Dr. Halîs Yerlîkaya’yî  beyanatê xo yê ANF’yî de qalê tecrubeyanê heyetî yê derheqê grevê vêşanîye kerd û vat serranê 1980’yî ra nat grevê vêşanîye benê û TTB no derheq de wayîrê tecrubeyêk o.

HEYETÊ WEŞÎYE AME RONAYENE

Dr. Yerlîkaya’yî qale arde grevanê vêşanî yê verênan ser û va: “Xeylî kesî bîyî astengdar û xeylî kesî merdî. Goreyê cerebnayîşan, rojanê grevî yê 40-50’î ra dima netîceyê giranî dest pêkenê û nêweşîyî benê kronîk. Ewro kewta roja xo ya 83’ine. Çend rojî naye ra ver tehlîye bîye û avukatan seba ke bêro tedawîkerdene muracatê Odaya Tabîban kerd. Muracat de ame waştene ke wa yew heyet bêro ronayene û hetê weşîye ra bêro teqîbkerdene. Naye ser ma zî yew heyet amade kerd.“

XETERÊ ENFEKSÎYONÎ ESTO

Qaso ke Dr. Yerlîkaya vano şîyê zîyaretê Leyla Guvene û no derheq de wina dewam kerd: “Leyla Guvene zaf rincan kewta û muayene red kerd. Tesîrê giranî yê grevê vêşanîye estê. Bi taybetî zî sîstemê pawitişî yê wucûdî ser têsîrêko pîl yeno viraştene û xetereyê enfeksîyonî peyda beno. Ha teber de ha hepisxane de bo, hetê temasî ra ganî bêro dîqetkerdene. Tabî ma wazenîme ke her çiyî ra ver, ganî grevê vêşanîye bireso netîce. Ganî nêro xo vîr ra kerdene ke, vêşanîya derge metabolîzma kena xetere. Merdim ganî nêbo riincan û enerjî xerc nêkero.

EKE BIWAZO MUDAXELE BENA

Kesê ke grevê vêşanîye de yê, eke nêwazê ma nêeşkenîme mudaxele bikîme. Mudaxele bi waştena kesî yena kerdene. Çi heyf ke grevanê vêşanîye yê verênan de, ha bizor ha nêweşxane de bi mudaxeleyan xeylî kesî bîyî astengdar û nêweşîyê kronîkî peyda bîyî. Dekstroz ke bêro dayene, nêweşîyî benê kronîk û kesî de xisar peyda kenê. Naye ra zî ganî Dekstroz bi îlaweyê B1’î bêro dayene.“

MA DO REYNA MURACAT BIKERÊ

Yerlîkaya’yî peynîya mulaqatê xo yê ANF’yî de wina vat: “Ma seba ke qisawetanê şarî, hem zî weşîya çalakwanan teqîb bikîme muracat kerd. La muracatê ma nêame qebulkerdene. Ma do reyna muracat bikerê. Sîstemo mewcud seba ke antîdemokratîk o, her çîyî red keno. Ma hekîmê ke heqê weşîye pîroz vînenîme nê çalakîyan teswîb nêkenîme la, teqîb kenîme.“