Wekîla DEM Partî ya Amedî Halîde Turkoglu derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.

Halîde ard ziwan ke tecrîdê Îmraliyî her warê cuye ra vila bîyo û vat: ''Îqtîdarê AKP-MHPyî polîtîkayê xo yê gemarinî yê bi kodanê dewleta netewe Îmrali de eşkera kerdî. Îqtîdar bi înkarkerdiş û qirkerdişê kurdan 22 serrî yo welat îdare keno. Nika zî pêro hêzê demokrasî, azadîye û muxalefetî hedefê îqtîdarî de yê. Tecrîdê Îmraliyî xora nê kerdişan ra cîya nîyê.''

Halîde pare kerd ke dewleta tirke wazena verê vilabîyayîşê perspektîfanê Rayberê Şarê Kurdî Abdullah Ocalanî bigêra û vat: ''Coka dewlete tim tecrîd kena giranêr. Fikrê Birêz Abdullah Ocalan ewro hetê dinya ra yenê qebulkerdene.''

Halîde da zanayene ke tecrîdê vera şarê kurdî zî her roje beno giranêr û vat: ''Seba ke meseleya kurdan nêra çareserkerdene tecrîd yeno girankerdene. Seba ke fikrê Abdullah Ocalanî vila nêbê tecrîd yeno girankerdene. Aqlê dewlete bêhuqûqîye, tecrîd û faşîzmî de israr keno la nê israrî ra do birijîyo. Xora 31ê adare de aqlê dewlete bin kewt.''

Halîde bale ante xoverdayîşê tepişteyanê sîyasîyan û vat: ''Herinda ke waştişê tepişteyanê grevê vêşanîye bêrê caardene tecrîd yeno girankerdene. Rejîmê faşîstî seba ke 31ê adare de bin kewt konseptê şerî yo newe vist dewre. Îqtîdar bi polîtîkayanê xo neçareserîya meseleya kurdan ferz keno, vera Başûr û Rojawanê Kurdîstanî operasyonanê îşxalî keno. Ganî vera nê kerdişan û tecrîdî roşnvîr, nuştox, akademîsyen, karker, kedkar, cinî, ciwan û pêro bindestî têkoşînê hemparî yê xurtî bikerê. Eke dormeyê Rayîrê Hîrêyînî de ma bêrê pêser, bi awankerdişê yewîya xo eşkenê tecrîdî bişiknê.''