Hasan Ocak û Ridvan Karakoç 28 serrî verî wexto ke ameybî destbendkerdene ameybî qetilkerdene. Bi wesîleya Hewteyê Têkoşînê Vera Vînîbîyayeyanê Destbendkerdeyan Karakoç û Ocak hetê Mayanê Şemeyî û ÎHDyî ra serê goranê xo de Goristanê Taxa Gazîyî yê Îstanbulî de ameyî yadkerdene. Sere de Hemsereka HDPyî Pervîne Buldan xeylêk kesî tewrê yadkerdişî bîyî. 

Sereka ÎHDyî ya Îstanbulî Gulserene Yolerî yadkerdiş de qisey kerd û ard ziwan ke ê bi serran o seba ke aqîbetê vînîbîyayeyan bêrê zanayene têkoşîn kenê. Gulserene vat: ''Cigêrayîşê ma yê raştîye dewam keno. La roja verêne ra nata îdarekarê dewlete serê sûcî gênê. Astengkerdişê edaletî dewam keno.'' 

Kekê Hasan Ocakî, Huseyîn Ocakî zî da zanayene ke înan cenazaya birayê xo dîya û belge kerda. Ocakî vat: ''Dewlete no qebul kerd la serê sucî girewt.''

Hemsereka Pêroyî ya HDPyî Pervîne Buldan îfade kerd ke ewro zî hişmendîya 90an dewam kena û îqtîdar de ya. Buldane pare kerd ke îqtîdarî bi na hişmendî Mayanê Şemeyî rê Meydanê Galatasarayî qedexe kerdo. 

Buldane bale ante weçînayîşê serekkomarîye yê 28ê gulane ser û vat: ''Tewirê vera faşîzmî û vergirewtişê faşîzmî erkê ma yo. Seba ke ma mabênê roşnîye û tarîye de tercîhêkî bikerê weçînayîşê 28ê gulane firsendo peyên o.''

Hanîfe Yildiza ke Mayanê Şemeyî ra ya da zanayene ke aye bi destê xo lajê xo şawito qereqolî la dewlete a xxapînaya, lajê ci vînî kerdo.