Têgêrayîşo Şorişgêr o Yewbîyaye yê Şaran (HBDH) bi wesîleya 1'ê Gulane eşkerayîyêka nûştekîye daye, vist vîrî ke faşîzmê AKP-MHP'yî Kurdistan û Tirkîya de hemverê şaran terorê dewlete bica ano, bi qirkerdiş, îşxal û destbendkerdiş û tepiştişanê sîstematîkan wazeno îqtîdarê xo bipawo, la eslê xo de demê xo yê peyênî ciwîyeno.

HBDH'yî da zanayene ke çîyo ke AKP û rejîmê ê birijno mucadeleyo yewbîyaye yê şar û kedkaranê Kurdistan û Tirkîya yo, bale ante serê grevanê vêşanîye yê ke bi serkêşîya Leyla Guvene hemverê tecrîdê serê Rayberê Şarê Kurdî Abdullah Ocalanî de dest pêkerdîbî û vat, “rixmê heme manîpulasyon û sansurî de zî bi hawayêkê rastekînî grev kewto rojdemê şaran.”

HBDH'yî bale ante serê 1'ê Gulane, Roşanê Karkeran ê Dinya û vat, “Wezîfeyanê tewr muhîman ê hêzanê şorişgêran ê yewbîyayeyan ra yew zî o yo ke 1'ê Gulane sey mewzîyanê xoverdayîşî organîze bikerê.”

HBDH'yî peynîya eşkerayîye de vat, “Ganî 1'ê Gulane sey merkezê yewîya muxalefetê cimatkîyî bêro dîyene. Waştişê azadîye yê şarê Kurdî û yê muxalefetê cimatkîyî ganî paralelê sinifa karkeran de bêro organîzekerdene. Pirê mabênê şaranê Kurdistan û Tirkîya do nê lingan ser o awan bibo. Ma sey HBDH veng danê heme şar, eciqnaye, cinî, ciwan û kedkaran ke 1'ê Gulane de vejîyê meydanan, xover bidê û şer bikerê. Roje roja cesaretî ya. Roje a roj a ke ma mucadeleyê şaran sey xincerêk bidê sîneyê îqtîdarê faşîstî ro.”