Vizêr taxa Battalgazî ya qezaya Altindagî ya Anqara de mabênê di grûban de pêrodayîş vejîya. Pêrodayîş de Emirhan Yalçinî cuya xo vînî kerde. Nayî ser tay grûban hêrişê cayanê karî yê surîyeyîjan kerd.

Rixmo ke polîsî ameyî cayê serebûtî zî hêrişanê vera surîyeyîjan dewam kerd. Tay taxan de keye û wesayîtê surîyeyîjan raştê hêrişî ameyî. Bi seyan kesê ke vejîyê kuçeyan hêrişê xo zêdîna û şîyî macîran ser. Balkeş o ke polîsan mudaxaleyê înan nêkerd. Hêrişê nîjadperestî de domanî zî tede xeylêk kesî birîndar bîyî.

Heyetê Rayberdişî yê Kongreya Demokratîke ya Şaran (HDK) derheqê hêrişê vera macîran de eşkerayîye daye.  HDPyî hukmatê AKP-MHPyî sey berpirsîyarê hêrişan name kerd û vat: ''Nê hêrişî netîceya polîtîkayanê diriyîyan ê îqtîdarî ke vera macîran yenê rayraberdene  de ameyî kerdene. Ma êyê ke hetê kede, demokrasî û haştîye de hole zanê ke îqtîdaro ke şarî vêşan û bêasayîş verdeno seba ke nêrazîbîyayîşanê vera xo kêm bikero tim tayînan keno hedef. Vizêr rîyê şewatanê daristanan ra kurdî senî kerdî hedef ewro zî surîyeyîjan kenê hedef. Hêrişo ke Anqara de vera surîyeyîjan ame kerdene  tehluleyê pîlî ramojneno. Ganî selahîyetdarî cade tedbîran bîgirê.  Sebebê nê qewimîyayîşan şarê ke vêşanîye û şerî ra remayî ê nêyê. Ma zanê ke hêrişanê nîjadperestan ra têna faşîzm xo weye keno.''