Heyetê Rayberdişî yê Kongreya Demokratîke ya Şaran (HDK) derheqê hêrişanê qirkeran ê vera Şingalî de eşkerayîyêke daye.

Eşkerayîye de ame vîrvistene ke Tirkîya 17ê tebaxe de Nêweşxaneyê Sikênîyê yê Şingalî da bombayan ver û hêriş de 8 sivîlî merdî.

HDKyî vat: ''No hêriş mojneno ke polîtîkaya qirkerdişî ya DAÎŞî ya vera êzidîyan pê destê Tirkîya dewam kena. Hêrişê vera Şingalî dewamê polîtîkayanê qirkerdişê êzidîyan o. Şarê êzidîyan pê têkoşînê xo vera DAÎŞî xoverdayîşêko tarîxî mojna. Nê hêrişî sûcê merdimîye, sûcê şerî yê û peyman û qanûnanê mîyanneteweyîyan binpay kenê. No sûcê hêrişê vera nêweşxaneyî ganî qetî bêro muhakemekerdene. Mesuldarîya her kesî ya ke wayîrê êzidîyan vejîyo. Ma sey HDKyî hêrişanê vera êzidîyan şermezar kenê û venga pêro şaranê Tirkîya û dinya danê ke paştî bidê şarê êzidîyan.''