Heyetê HDP’yî yê bi serekîya hemsereka HDP’yî Pervîn Bûldane vizêr ra paytext Berlîn de pêvînayîşan keno. Pîya Bûldane heyeto ke tede parlamentera Êlîhî Feleknaz Ûca, parlamentero verên ê Şirnexî Faysal Sariyildiz, hemşaredara verene ya Cizîre Leyla Îmrete û temsîlkarê HDP’yî yê Ewropa Farûk Dorû zî estbî xeylî kesanê payeberz ê partîyan dir pêvînayîşî kerdî.

Endamanê HDP’yî bi sereka pêroyî ya Partîya Demokratan a Sosyale (SPD) Andrea Nahlese, hemserekê Partîya Çepgêre Berndt Rîexîngerî dir pêvînayîş kerd. Ver bi şanî zî Partîya Çepgêra ra Gregor Gysî yo ke ronayoxanê partîye bi reyde û temsîlkaranê Partîya Zergûne dir roniştî.

Temsîlkarê HDP’yî Farûk Dorûyî vat ke pêvînayîşan de derheqê şîyayîşê avûkatan ê Îmrali de persî ameyê kerdene û vat, “Seba ke qerarê MPKE yê derheqê tecrîdî de bêro bicaardene ma wazenê ke Almanya zextan Tirkîya ser o bikero. Xusûsen zî seba ke Tirkîya qanûnanê xo bica bîyaro ma zaxto ke do hukmatê Almanî Tirkîya ser o bikero zaf muhîm vînenê. Bêguman nê waştişê zaf giran^inêyê, ganî her dewlete nê qanûnan bica bîyaro.”

Bûldane Kombîyayîşê Şarî de Qisey Kerd

Endamanê heyetî dima ra lokalê NAV-DEM’î de Kurdistanijan û dostanê înan dir roniştî. Bûldane derheqê pêvînayîşê avûkatan û Ocalanî de vat, “Gamêka zaf muhîm a ke Ocalanî di avûkatê xo dîyê. Muhtewaya pêvînayîşî ramojnena ke do mucadele tîya ra tepîya bi çi bêro tacîdarkerdene.” Bûldane vat ê pêvînayîşê 2’ê Gulane ra sey HDP hayîdar bîyê.

Endamanê heyetî ra Feleknas Ûca zî vat, “Eke şarê ma hîna zaf nê xoverdayîşî rê wayîr vejîyo to tecrîd hîna rew bişikîyo. Ganî heme aşitîperwer û demokrasîperwerî hemverê tecrîdî de vinderê.”