22yê teşrîna verêne ya 1993yî de hêzanê dewleta tirke kişîyayîşê Fermandarê Cendirmeyan ê Amedî Bahtîyar Aydinî kerdbî bahane û hêrişê qezaya Licê ya Amedî kerdbî. Licê rojêke dîyabî bombayan ver. Hêrişan de domano 2 serre zî tede 16 kesî ameybî qetilkerdene, 35 kesî birîndar binî û 402 banî û 242 dikanî ameybî talankerdene.

Dewaya vera nê qirkerdişî bi bahaneya 'verguman merdo' ameye betalkerdene. Hemvervatoxanê Komîsyonê Heqanê Merdiman û Huqûqî yê HDPyî Nuraye Ozdogan û Serhat Erenî derheqê babete de eşkerayîyêke daye.

Eşkerayîye de dîya zanayene ke derheqê Qirkerdişê Licê de delîlî nêameyê arêdayene, pêro şahîdî nêameyê goşdarîkerdene û kiştoxî ameyê pawitene. Eşkerayîye de ame parekerdene ke kesê ke ameyêne muhakemekerdene yew bi yew vera dîya, teyna vergumanêk muhakeme bîyêne û seba ke o zî merdo peynî de dewa ameya betalkerdene.  Hemvervatoxan vat: ''Betalkerdişê Dewaya Licê pakîkerdişê sûcanê vera kurdan o. Tarîtîya serranê 90an qetî nêqedîyaya, teyna konseptê ci vurîya. Heta ke tarîtîya 90an de dewlete têrî nêba û faîlan ceza nêkera haştîye û demokrasî do nêrê. Ma venga pêro selahîyetdaran danê ke sûcdarê Qirkerdişê Licê wa muhakeme bibê, nêpawîyê.''