Partîya Şaran a Demokratîk  (HDP) roja 31’ê Adare de vera  binpaykerdişan bi 120 hezar wezîfedaran do sindoqan bipawo.

Hetê Komîsyonê Karanê Weçînayîşî yê HDP’yî ra tedbîrê bi koordîne de bitaybetî bajarê sey Amed, Dêrsim, Colemêrg, Mêrdîn, Edene, Agirî, Êlih, Çewlig, Bedlîs, Xarpêt, Erzirom, Mersin, Mûş, Qers, Riha û Wan o ke HDP tede bihêzo, ser o ame vindetene. Goreyê zanayîşê ke komîsyonê dayê nê bajaran de bi 2 hezar û 500 xebatkarê wareyî yê cîyayî û endamê heyetê  sindoqan ê ke hetê YSK’yî ra bi fermî ameyê qebûlkerdene û muşahîdê HDP’yî,  weçînayoxan reyde  sindoqan do bipawê. 

Heta şan do bixebitîyê

59 hezar endamê heyetê sindoqan ê HDP’yî yê ke hetê YSK’yî ra ameyê qebûlkerdene û 60 hezar muşahîdê HDP’yî  do temamê Tirkîya de xebat bikerê û sindoqan ra wayîr bivejîyê. Bajaranê Kurdan û bajaranê rojawanî de,  her cayan de Masayê Koordînasyonê Krîzî awan kerdî. Masayanê krîzî de hemserekê bajarî, namzedê hemşaredarîye, endamê heyetê weçînayîşê û avûkatî do bibê.

Komîsyonê weçînayîşê heşarîye daye

Komîsyonê weçînayîşî yê HDP’yî na heşarîye daye: “2 saetî verê destpêkêrdişê raydayîşî ganî her kes serê wezfeyê xo de bo. Ganî her kes 31’ê Adare de wextê xo de cayê wezîfeyê xo de amade bo. Ganî heta sindoqî ameyî akerdene û rayî ameyî hûmarnayene û  îmzayî ameyî eştene kes wezîfeyê xo canêverdo. Heta ke sindoqî û rayî teslîmê rêxistinanê bajar û qezayan nêkerdî cayê xo ra nêlewîyê.”