Hetkarê Hemserekanê HDPyî yê Komîsyonê Heqanê Merdiman û Huqûqî ra Berpirsîyar Umît Dedeyî derheqê dewaya qefilnayîşê HDPyî de ANFyî rê qisey kerd.

Dedeyî îfade kerd ke 7ê hezîrana 2015î ra nata vera HDPyî îqtîdara polîtîkayanê teda ano ca û xîret keno ke HDP nêeşko bixebito. Dedeyî pare kerd ke rixmê qeyûman, tepişîyayîşê wekîlan, hemşaredaran, hemserekan û kampanyayanê lînçî zî înan têkoşînê xo dewam kerd.

Dedeyî vat: ''Partîya ma seba haştîye xîret kena. Vera nê xîretanê haştîye ê hêrişê partîya ma kenê. Tecrîdê vera Birêz Ocalanî û dewaya qefilnayîşê partîya ma pabesteyê yewbînan ê. Têna Birêz Abdullah Ocalan eşkeno haştîye bîyaro.''

Umît Dedeyî eşkera kerd ke HDP xo sey rayîrê hîrêyînî pênase keno û vat: ''Seba ke şarê Tirkîya pê aramî û haştîye biciwîyê ganî ma şarî reyde bixebitê. Qefilnayîşê HDPyî do fikrê HDPyî werte ra nêwedaro, eqsê ci do giranêr bikero.''

Dedeyî da zanayene ke HDP do şarî reyde Kurdîstan û Tirkîya de kombîyayîşan bikero û vat: ''Ma do waştişanê şarî bimusê. Ma do qetî fikrê HDPyî nêverdê. Ma do vera dewaya qefilnayîşî şarî reyde kombîyayîşan bikerê û goreyê pêşnîyazan metodê xo biweçînê.''