Heyetê Rayberdişê Merkezî yê HDPyî bi eşkerayîyêke qurbanê Qirkerdişê (Ferman) Şingalî yê 3ê Tebaxa 2014î yad kerdî.

HDPyî vist vîrî ke cerganê DAÎŞî Şingal de tewr tay 5 hezar kurdê êzidîyî qir kerdî, bi hezaran êzidîyî esîr kerdî, doman û cinîyî remnayî û koçkerdiş êzidîyan rê ferz kerd. HDPyî bale ante ser ke Qirkerdişê Şingalî 2016 de hetê Konseya Heqanê Merdiman a Neteweyanê Yewbîyayeyan (NY) ra sey 'jenosîdî' amebi qebulkerdene û qirkerdiş raporanê dezgehanê mîyanneteweyîyan de zî kategorîya 'sûcê vera merdimîye' de ca girewt.

HDPyî vat: ''Ma hêrişanê DAÎŞî yê vera êzidîyan şermezar kenê û paştî danê têkoşînê estbîyayîşî yê êzidîyan. Ganî Tirkîya qirkerdişê êzidîyan sey jenosîdî qebul bikera û polîtîkayanê tehdîtkerdişî û hêrişan ê vera Şingalî ra fek vera bida. Ganî êzidîyê ke neçare mendî ke koçê Tirkîya bikerê, asayîşê înan bêro caardene. Seba xelisnayîşê cinî û domananê êzidîyanê ke destê DAÎŞî de yê ganî asta mîyanneteweyîye de xebatî bêrê kerdene. Ma serrgêra 8. ya Qirkerdişê Şingalî de dîyar kenê ma hetê êzidîyan de yê û pêro êzidîyanê ke ameyê qirkerdene bi rêzdarî yad kenê.''