Heyetê Rayberdişê Merkezî yê HDPyî derheqê xespkerdişê wekîlîya Semra Guzel de eşkerayîyêka bi sernameyê 'Semra Guzel îradeyê şarê ma ya, ma do ferasetê darbekerî ra hesab bipersê' daye.

Eşkerayîye de ame parekerdene ke betalkerdişê wekîlîya Semra Guzel gamêka newîye ya darbeyanê sîyasîyan ê îqtîdarî ya û ame vatene ke parlamento reyna daxîlê mîyanê darbeyêka sîyasî ya bîne ameyo kerdene. Eşkerayîye de wina ame vatene: ''Na bire nîşaneya aqilê kumpasî ya ke AKP hemkaranê xo ra girewta. Na bire dişmenîya vera îradeyê şarê kurdî ya. Darbeyêka vera sîyasetê cinîyan a.

Na darbeya sîyasîye têna vera parlamentera ma û partîya ma nê, vera sîyasetê demokratîkî zî ameye kerdene. No bi partîya ma sînorkerde nîyo, do wina nêmano. Darbekarî, bêhuqûqî û kumpaswanîya îqtîdarî eşkera yê. Êyê ke bi nê kumpas, hêriş û darbeyan do bin bikewê îqtîdaro. Ne partîya ma ne zî şarê ma do apey gamêke nêerzê. No îqtîdar do bin bikewo û şarê ma do bi xoverdayîşî ser bikewo. Semra Guzel îradeyê şarê ma ya û do tim biba wekîla ma.''