HDP: Ma soz danê Leyla, ma do tecrîdî bişiknê

Hemsereka Pêroyî ya HDP’yî Pervîn Buldane vat ke, “Ma soz danê Leyla, roşnîya çimanê to do qet xow ra nêşora. A roşnî do biba bi mîyonan kes û a do ameyoxê ma roşn bikera. Ma do qetî tecrîdî bişiknê.”

Rojdemê sereke ya Kombîyayîşê Gruba HDP’yî ya Melîsî, no hewte çalakîyê grevê vêşanîye yê ke seba wedartişê tecrîde Îmraliyî dest pêkerdê bi. Pervîn Buldane kombîyayîşê grube de qisey kerd û vat, “Ma do qetî tecrîdî bişiknê.” Buldane ard ziwan ke ewro Heyeto Pêroyî yê Meclîsî de ê do bi tewrê parlementerê HDP’yî heta şewdir nobeta haştîye bigê.

SEBA KE MA BIBÊ VENGÊ LEYLA GUVENE,  MA TÎYA YÊ

Buldane qiseykerdişê xo wina dewam kerd: “Ma seba Leyla Guvene ameyîme yew ca. Tirkîye ra heta Ewropa vengê aye û xoverrodayîşê aye sînorî derbaz kerdî. Seba ke ma bibê vengê aye ma tîye ameyîme yew ca. Ewro xoverrodayîşê aye roja 90’ine de dewam keno. Sebahat Tûncel û Selma Irmake zî seba paştîye bidê çalakîya aye 21 rojî yo ke grevê vêşanîye de yê. Zîndanan de 315 grewteyî grevê vêşanîye de yê. Ewropa de, zindanan de çalakîye vila bena. Tecrîdê Îmralîyê 20 serrî yo ke dewam keno. Welat 20 serrî yo ke binê tecrîde yo. Demo ke tecrîd çin bi, haştî, roşnî û aramîye bîye. Demo ke tecrîdî dest pêkerd, bi tarî û şer. Tecîrîd tarîyî ya. Çare û haşîtîye zî roşnî ya. Seba ke tecrîd bişikiyo, Leyla Guvene 90 rojî yo ke grevê vêşanîye de ya. Ma bawer kenê qetî tecrîd do bişikeyo û wexto ke tecrîd şikîya tijê sewbîna do biveja. Ma soz danê Leyla. Roşnîya çimanê to do qet xow ra nêşora. A roşnî do biba bi mîyonan kes û a do ameyoxê ma roşn bikera. Ma do qetî tecrîdî bişiknê.

GANÎ MA LEYLA Û HEVALANÊ CI BIDÊ CIWÎYAYÊNE

Ma defêna vengdayîşê heme kesanê ke wayîrê wijdanîyê kenê ke seba Leyla û heme hevalanê grevê vêşanîye de yê bidê ciwîyayene, ma bibê vengê Leylaye. Cuya Leyla cuya welatî ya, haştî û demokrasî ya. Ma vengdayîşê hukmatî kenê hêvîya şaran a aştîye nêşora xow ra. Hîna ke rayîr nêzdî yo agêrê. Lezabez tecrîdî wedarê.

MA NOBETA HAŞTÎYE GÊNÊ

Ma do ewro heta şewdir meclîsî de heme parlamenteran reyde nobeta haştî gênê. Vengê haştîye nê welatî de do qet nêro birnayene.”