HDP: Mesuldarê hêrişê vera merkezê ma yê pêroyî îqtîdar o

HDPyî pare kerd ke vizêr şewe vera bînaya înan a merkezê pêroyî hêriş ameyo kerdene û mesuldarê nê hêrişî îqtîdar o ke hertim HDP keno hedef.

Heyetê Rayberdişê Merkezî yê HDPyî pê eşkerayîyêke da zanayene ke vizêr şewe vera bînaya înan a merkezê pêroyî hêrişêk ame kerdene.

Eşkerayîye de wina ame vatene: ''Vizêr şewe saete 00.05 de komêka 3 hêrişkeran hêrişê bînaya ma ya kerd. Seke dîmenanê kamera ra yeno famkerdene polîsê ke 2 noqtayan de seba pawitişê ma wezîfedar ê, verê hêrişî de asteng nêbîyî û hêrişî rê bîyî hetkar. Hêrişkeran binê çimdarîya polîsan de hêrişê bînaya ma kerd û hema zî nêameyî destbendkerdene. No zî mojneno ke armancê hêrişî çita yo û hetê kamî ra ameyo kerdene.

Rixmê qedexeyê tebervejîyayîşî roja yewîne ya Roşanê Remezanî de no hêriş vera partîya pîle ya hîrêyîne ya Tirkîya ame kerdene. Mesuldarê nê hêrişî îqtîdar o ke wayîrê kaosî yo û  hertim HDP keno hedef.''