Heyetanê Rayberdişî yê Merkezê HDP û Partîya Çep a Keske bi eşkerayîyêke tewirê xo yê tûrê diyînî yê weçînitişê serekkomarîye yê 28ê gulane eşkera kerd.

Hemsereka Pêroyî ya HDPyî Pervîne Buldana ke kombîyayîş de qisey kerd vat, "Ma do tûrê diyînî yê weçînitişî de şirê sindoqan ser, rejîmê yewmerdimî bibedilnê"

Buldane bale ante protolê ke vizêr mabênê Partîya Zaferî û namzedê Îtîfaqê Mîletî Kemal Kiliçdarogluyî de ame îmzakerdene ser û nê vat: "Hedefê têkoşîn û rayîrê ma yê hîrêyinî oyo ke komelî nê rejîmî ra bixelisnê û biresnê azadîye. Ma tim sereberz semedê heqanê mazlûman têkoşîn kenê. Qeyûmê ke vera îradeyê kurdan ameyî cakerdene vera azadîya heme şaranê Tirkîya yê. Çaresernêkerdişê meseleya kurdan heme komelî fîneno tengayî.  Şertî senî benî wa bibê ma do tim îradeyê şarî serê heme îradayen de tepişê û semedê ameyoxê azad têkoşîn bikerê. Ma sey HDP û Partîya Çep a Keske semedê heq û huqûqê şarê têkoşîn kenê û se beno wa bibo ma do tewirê xo ra peyser game meerzê. Ma do pêro pîya şirê sindoqan ser û nê rejîmê yewmerdimî bibedilnê.”

Hemserekê Pêroyî yê HDPyî Mîthat Sancarî zî  28ê gulane sey refarandûmî name kerd û vat, "Ma polîtîkaya xo ya weçînitişî zî sey polîtîkayanê xo yê bînan zelal rayra benê. Nika seba ke tay averşîyayîşî vejîyayî werte ma reyna tewirê xo şima dir pare kenê. Nê qewimîyayîşê peyênî seba vejîyayîşê  têmîyankewtiş û seba ke şar nêşiro sindoaq ser serê ameyî kerdene. Wazenê şarî bidê xapî ro. Ma waştişê xo yê bedilnayîşê demokratîkî ra peyser game nêerzenê. Ma qerardar ê ke ma do rejîmê qesre bibedilnê.  Ma veng danê şarê xo, bitaybetî kesê tûrê verênî de nêşîyî sindoqî ser, ma şirê sindoqan ser, sindoqan bipawê û bi îradeyê xo nê rejîmî bibedilnê."