Hemserekê Pêroyî yê HDPyî Mîthat Sancarî û Hemvervatoxanê Partîya Çep a Keske Çîgdeme Kiliçgun Uçar û Îbrahîm Akinî vizêr netîceya weçînayîşê serekkomarîye ra dima eşkerayîye daye çapemenîye.

Hemvervatoxî Îbrahîm Akinî bale ante ser ke Erdoganî bi pêro îmkananê dewlete kampanyaya weçînayîşî kerda û vat: ''Erdoganî pê trolan, manîpulasyonan, provakasyon û kayanê xiraban kampanyaya weçînayîşî kerde. Ma turê yewinî de verê Erdoganî girewt. Ma turê diyînî de zî bi polîtîkaya 'rijnayîşê rejîmê tekcamêrdî' têgêrayî. Şarê ma wayîrê na polîtîka vejîya û turê diyînî de zî bi qerardarî şi sindoqan ser. 16 şaristananê şarê ma reyna Kiliçdaroglu weçîna. Ma şarê xo rê sipas kenê û têkoşînê înan selam kenê. 

Eke Îtîfaqê Cumhurî stratejîya xo ya teda û ablûqakerdişî de israr bikero Tirkîya de krîzê ekonomîk, sîyasî û komelkî do berê rijîyayîşê pîlî abikerê. Ma do vera nê polîtîkayan xora tim têkoşîn bikerê û sîyasetê demokratîkî pîl bikerê. Ganî hêverî no sîstemê serekkomarîye bêro vurnayene. Ma tîya de yê. Ma hem Meclîs de hem zî pêro waranê cuye de serkêşîya têkoşînê demokratîkî bkerê, sîyasetê demokratîkî pîlêr bikerê. Ma do qetî nê rayîrî ra anêgêrê. Ma do pîya têkoşîn bikerê û ser bikewê.''