HDP: Pawitoxê heqanê merdiman Gergerlîoglu têna nîyo

HDPyi cezaya ke dîyaye Gergelîogluyî sey qerarê sîyasîyî name kerd û vat: ''Rixmê nê îqtîdarî yo ke dişmenê heqanê merdiman û demokrasîyî yo ma do têkoşînê haştîye û edaletî cameverdê.''

Cezaya hepsî ya 2 serran û 6 mengan a ke bi îdîya 'propagandaya rêxistine' dîyayebî Wekîlê Partîya Demokratîke ya Şaran (HDP) yê Kocaeli Omer Faruk Gergerlîogluyî hetê Daîreyê 16. yê Mehkemeya Berze ra ameye tesdîqkerdene.

HDPyî derheqê qerarê cezaya hepsî ya Gergerlîogluyî de eşkerayîya nuştkîye daye. Eşkerayîye de bale ameye ser antene ke pê nê qerarî reyna  ame vînayeneke huqûq senî yeno binpaykerdene  û ame vatene ke Mehkemeya Berze bi zextê îqtîdarî no qerar girewt.

Eşkerayîye de nê ameyî vatene: ''Rixmo ke Gergerlîoglu wekîl o û destnêpanayîşê ey esto ceza ameye dayene. No binpaykerdişê pêkerdişanê mîyanneteweyî yo. Gergerlîogluyo ke serekîya dezgehanê komelê sîvîlî kerd û demê çareserîye de keda ci esta seba ke xeberêke pare kerde bi sûcê propgaganda yeno sûcdarkerdene ke no goreyê huqûqê Tirkîya û Mehkemeya Heqanê Merdiman a Ewropa zî binpaykerdişê heqî yo.

Baldaro ke xebera ke Gergerlîogluyî seba ke pare kerde ceza dîyaye ci, sîteyo ke qexebere weşenaye derheqê ci de cipêrsayîşêk nêame kerdene. Îqtîdar  wazeno wekîlê ma yo heqê heme şaran paweno û şarê Kocaelî yo ke o vîjnayo ceza bikerê. Îqtîdar nêwazeno ke binpaykerdişê heqanê ke kenê bêrê eşnawitene.

 Ma zanê ke nê qerar de ne huqûq ne zî vîjdan esto. No qerarêko sîyasîyo. Seba ke Gergerlîogluyî cigêrayîşo rut, îşkence û muameleyo xirab, remnayîşê merdiman, tepişteyê nêweşî, tepişteyê digan û domanî ardî rojdem, zulmo girano ke yeno kerdene ard ziwan yeno waştene ke wa o vengê ci mevejîyo. Rixmê nê îqtîdarî yo ke dişmenêheqnaê merdiman û demokrasîyî yo ma do têkoşînê haştîye û edaletî cameverdê.''