Emîne Şenyaşara ke qezaya Pirsûsî ya Riha de  wird lajê ci û mêrdeyê ci hetê pawitox û merdimanê Wekîlê HDPyî Halîl Îbrahîm Yildizî ra kişîyayî lajê xo Ferît Şenyaşarî reyde semedê caardişê edaletî 26 rojî yo çalakîya edaletî kenê.

Partîya Demokratîke ya Şaran (HDP) derheqe çalakîya Şenyaşaran a ke roja 26. de ya eşkerayîye daye.

Eşkerayîya ke bi îmzayê Hetkarê Hemserekanê HDPyî yê Komîsyonê Heqanê Merdiman û Huqûqî ra Berpirsîyar Umît Dedeyî ameye parekerdene de ame vîrardene ke dewaya qerarî  de keyeyê Şenyaşaran ke raştê hêrişê Wekîlê AKPyî Yildiz û merdimanê ci ame ra Fadil Şenyaşaro ke birîndar ame tepiştene cezaya 37 serran û 9 aşman dîyaye ci û keyeyê Yildizî ra zî kesêkî rê cezaya 18 serran ameye dayene.

Eşkerayîye de nê ameyî vatene: ''Muhakemekerdiş goreyê pawtişê wekîlê AKPyî û merdimanê ci yeno kerdene. Dayîke Emîne Şenyaşar bi rojan o seba ke rayapêroyîye rê bidê zanayene ke no cipêrsayîş edîl nîno rayraberdene verê Edlîyeya Riha de Çalakîya Edaletî tepişte û xeyêk rey ameye destbendkerdene. Rixmê nayî vengê aya nêame eşnawitene. Hukmî qerarêko edîl nêgirewt. Ma sey Komîsyonê Huquqî yê HDPyî seba ke edalet bêro ca çîyo ke destê ma ra yeno kenê, ma vanê ke ewro mebo zî siba do edalet bêro ca.''

Hetê bînî ra Wekîla HDPyî ya Riha Ayşe Surucu û rêxistina bajarî  keyeyê Şenyaşarî zîyaret kerd.  Surucu paştî daye Şenyaşaran û ard ziwan ke semedê caardişê edaletî têkoşînê înan do tim dewam bikero.

Emîne Şenyaşar zî seba ke cezaya girane dîyaye lajê ci Fadil Şenyaşarî hersê xo ard ziwan û vat: ''Ma semedê edaletî şîyî Anqara. Ma rê vat  ''tîya rê şirê, edalet binê erdî de yo''. Ma do o edaletî binê erdî ra vejê. Heta caardişê edaletî ma tîya de yê. Şima dewlet ê, çi nimnenê?''