Hemvervatoxanê Partîya Çep a Keske Çîgdeme Kiliçgun Uçar û Îbrahîm Akinî, Hemserekanê HDPyî Pervîne Buldan û Mîthat Sancarî derheqê netîceyanê weçînayîşî de merkezê pêroyî yê HDPyî de kombîyayîşê çapemenîye kerd.

Hemvervatoxa Partîya Çep a Keske Çîgdeme Kiliçgun Uçar da zanayene ke ê nêeşkayê hedefê xo yê weçînayîşan bi temamî bîyarê ca û vat: ''Netîceyê weçînayîşan semedê ma serkewte nîyê. Hetêkî ra dewaya qefilnayîşî û yê Kobanê, hetê bînî ra zî operasyonê destbendkerdiş û tepiştişî ma ser o teda viraşte. Bi fermanê îqtîdarî hêrişê kampanyayanê ma yê weçînayîşî ame kerdene. Dek û dolab û hîleyanê îqtîdarî ra nê netîceyî vejîyayî werte. Hetê bînî ra ma mesajê komelî girewte ke ganî ma xo rexne bikerê û rexneyanê xo zî pêşkêş bikerê. Ma na mesuldarîya xo do bîyarê ca. Ma pare kenê ke kêmasî û qîmîyanê xo ser o şarê xo reyde pê nîqaşan biercnê û seba raştkerdişê înan têbigêrê.

Wa zerrîya şarê ma werax ba. Ma seba turê diyînî yê weçînayîşê serekkomarîye bi xurtî têbigêrê. Seba ke weçînitoxanê ma demokrasî û edalet weçîna, Erdogan nêeşka turê yewinî de ser bikewo. Coka ma şarê xo ra û pêro embazan ra sipas kenê. Ma bi qerardarî têkoşînê xo rê dewam bikerê. Wa çew pê şik nêkewo û zerrîya xo tal nêkero. Ma do peynîya rejîmê tekcamêrdî bîyarê.''

Hemserekê Pêroyî yê HDPyî Mîthat Sancarî dima cewab da persanê rojnamegeran. Sancarî persê ''Seba ke şima Îtîfaqê Kede û Azadîye reyde kewtê weçînayîşan gelo rayê xo vînî kerdî?'' ser o vat: ''Ma tim vat ke ma pê yew lîste debikewê weçînayîşan û ma no qiseyê xo ser o vindertî. La hetê bînî ra mîyanê îtîfaqan de tim rîskî virazîyenê. Nê rîskan ra tayênî raşt bîyî. Ma do nînan ser o îtîfaqî reyde nîqaş bikerê. Welat de rayê ma kêmîyayê. Bi taybetî şaristananê rojawanê welatî de rayê ma zaf kêmîyayê. Aseno ke ma ser nêkewtê. Ma do sebebanê înan ser o nîqaşan bikerê. Eke yew kêmasî, bêqîmîya ma est a xora ma do rexneyanê xo bidê.''