Vervatoxa Meclîsê Cinîyan ê DBPyî Bêrîvane Bahçecî bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan ANFyî rê qisey kerd.

Bêrîvana ke Colemêrg de 25ê Teşrîna Peyêne pêşwazî kena pare kerd ke Colemêrg de têkoşînê cinîyan beno pîlêr.

Bêrîvane da zanayene ke dewlete kena ke komelî bêveng bikera û polîtîkayê qededexekerdişê sloganê 'Jin, Jiyan, Azadî'  û destsernayîşê şaredarîyan zî îsbatê ney ê. Bêrîvane vat: ''Qeyûmê Dêrsimî hêverî JIN Kart betal kerd. Bi destsernayîşê şaredarîyan keyeyê destekê cinîyan ameyî qefilnayene. Nê tesadufî nîyê. Êyê ke dest nanê şaredarîyan ser destkewteyanê cinîyan rijnenê. 

Qedexekerdişê sloganê 'Jin, Jiyan, Azadî' nîşaneya dişmenîya îqtîdarî ya vera cinîyan a. Jin, Jiyan, Azadî teyna sloganêj ney felsefeyêka cuye ya. Na felsefe pêro dinya ra vila bîya. Ma do felsefeya Jin, Jiyan, Azadî her warî de hîna zaf vila bikerê.''

Bêrîvane îfade kerd ke dewlete Kurdîstan de hêrişanê şerê taybetî kena û vat: ''Ma sey Meclîsê Cinîyan ê DBPyî 3 mengan kargehê 'kombîyayîşê vera şerê taybetî' kerdî. Ma 15 şaristanan de 73 kargehî viraştî. Ma xo resna 3200 cinîyan û şarî. Nê kargehan de ma hişmendîyêke awan kerde. Şarê ma vera polîtîkayanê şerê taybetî wurzeno we.''

Bêrîvane peynîya qiseykerdişê xo de dîyar kerd ke ê sey Meclîsê Cinîyan ê DBPyî 25ê Teşrîna Peyêne de Colemêrg de yê û vat: ''Ma tîya de rayraşîyayîş bikerê. Dewlete Colemêrg de bi hawayêkê zêdeyî  muracatê polîtîkayanê şerê taybetî kena. Colemêrg de dewlete bi zorî verê ciwanan dana tîryakî û fuhuşî. Coka ma venga pêro cinîyan danê ke beşdarê 25ê Teşrîna Peyêne bibê.''