Çarçewa çalakîyanê 25ê Teşrîna Peyêne Roja Têkoşînê Vera Şîdetê Serê Cinîyan de cinîyî şaristananê Vakurê Kurdîstanî de vejîyayî waran.

Amed de serkêşîya Koma Duçerxeyan a Jinan a Amedê de turêk ame organîzekerdene. Cinîyan pankarta 'Destê xo keda mi, nasnameyê mi û bedenê mi ra biancê' akerde. Vervatoxa Koma Duçerxeyan Kadrîye Kaya dîyar kerd ke xêrê tecrubeyanê têkoşînî û xîretanê cinîyan ra felsefeya 'Jin, Jiyan, Azadî' pêro dinya de veng veto. Dima cinîyan bi bisîkletanê xo yê bi nuşteyê 'Ma qetî sereyê xo nêard war' turê xo kerd.

Riha de TJA, Meclîsê  Cinîyan ê DEM Partî, DBP û Meclîsê Mayanê Haştîye Nobeta Xalfetî ya vera qeyûmî zîyaret kerde. Cinîyan bi beşdarîya Hemşaredaranê Xalfetî eşkerayîye daye. Tîya de Hemsereka DEM Partî ya Dîlokî Zozane Ayhan qisey kerd û vat ke cinîyî wazenê biciwîyê, nêkişîyê. Hemşaredare Sanîye Bayram zî qisey kerd û vat ke ê do Jin, Jiyan, Azadî ra fek vera nêdê. Eşkerayîye bi çepik û tîlîlîyan qedîyaye.

Qers de serkêşîya Meclîsê Cinîyan ê DEM Partî de eşkerayîye dîyaye. Hemşaredarê cinîyî yê Dîgor, Qaxizman û Pazarcixî û xeylê cinîyî tewrê eşkerayîye bîyî. Hemşaredara Qaxizmanî Gunere Hatay qisey kerd û vat ke ê do tim vera serdestîya camêrdan bi bi felsefeya “Jin, jiyan, azadî” waran de bibê.

Bedlîs de Komeleya Aryen Hunerî verê AVMyê Yaşamî de, qezaya Tetwanî de pêramotişêk amade kerd. Pêramotiş de berhemê cinîyan ameyî mojnayene. Pêramotiş qaşo di rohan biameyêne kerdene la astengîya polîsan ra qedîya. Hetê bînî ra mamostaya resimî Zozane Bar û cinîyêka bîne zî ameyî berdene bi Mudirîya Asayîşî.

Colemêrg de Merkezê Heqanê Cinîyan ê Baroyê Colemêrgî 'Xeta Alo Şîdetî' awan kerde. Xete seba cinîyanê mexdûranê şîdetî do 24 saetan xizmet bida. Nûmareyê xete 0538 877 10 30 o.

Êlih de Merkezê Heqanê Cinîyan ê Baroyî bi şîarê 'Gelo ma pîya vera şîdetî se bikerê?' rayraşîyayîş kerd û eşkerayîye daye. Avûkate Ayşenure Demîr Ariç tîya de qisey kerd û vat ke kişîyayîşê cinîyan polîtîk ê û ganî cinîyî heqanê xo bipawê, seba nînan têkoşîn bikerê.

Îstanbul de Komeleya Lêkolînên Kurdî bi şîarê 'Ver bi 25ê Teşrîna Peyêne' semînerêk da. Şêwirmenda Psîkolojîke Esra Kahraman komxebatêke semîner de kerd. Dima cinîyan pîya atolyeya hunerê destan akerde.