Cinîyan xeylê şaristanan de 25ê Teşrîna Peyêne bi çalakîyanê cîyayan pêşwazî kerd û mesaj da ke ê do pîya şîdetî vindarnê.

Wan de TJA û TUHAY-DERî cinîyan ê tepişteyan rê kartî şawitî. Cinîyan bi slogananê "Jin, jîyan, azadî" û "Bijî berxwedana zindanan" berz kerdî û kartî PTTyî ra posta kerdî.

Colemêrg de Şaredarîya Geverî de semînerêk da. Psîkologe Şacane Canan Capraz vat ke ganî têkoşînê vera şîdetî bi hawayêkê rêxistinkerdeyî bêro kerdene.

Mersîn de Meclîsê Cinîyan ê DEM Partî cinîyê karkerê tekstîlî zîyaret kerdî. 

Qezaya Farqînî ya Amedî de rêxistina DEM Partî parkêke seba vîrameyîşê Rojîne Kabaîş akerde. Hemşaredara Farqînî Sevîme Bîçîçî, keyeyê Rojîne û xeylê kesî tewrê akerdişî bîyî.

Qezaya Erxenî ya Amedî de zî Hemşaredare Bîrsene Azak Bayar û endamanê Meclîsê Şaredarîye broşurê agahdarkerdişî vila kerdî.