Seba weçînayîşê serekkomarîye yê Tirkîya turo diyîn 28ê gulane de yo. Heyetanê Rayberdişê Merkezî yê HDP û Partîya Çep a Keske weçînayîşanê 14ê gulane ra dima 16ê gulane de kombîyayîşêko hempar kerd û derheqê kombîyayîşî de eşkerayîyêke daye.

Eşkerayîye de ame vatene ke rixmê teda û hîleyan zî Partîya Çep a Keske Meclîs de bîye hêzo hîrêyîn o tewr pîl. Eşkerayîye de ame parekerdene ke weçînayîşê 14ê gulane ke serkewtişo ke nînan ra pawîyayêne nêqewimîyayo coka wird partîyî zî do rexneyanê xo bidê. 

Eşkerayîye de bale ameye antene turê diyînî yê weçînayîşê serekkomarîye ser û wina ame vatene: ''Weçînayîşî ma rê têkoşînê demokrasî û azadî yê. Îqtîdarê AKP-MHPyî û Îtîfaqê Cumhurî bêmabên hêrişê kurdan, cinîyan, ciwanan, bindestan û muxalefetî keno. Heta nika konseptê şerî yê nê îqtîdarî pê têkoşînê şarê ma ame pûçkerdene. Ma reyna vanê ke ma tîya de yê û xurt ê. No fikr, tradîsyonê têkoşînî qetî do apey nêşorê. Ma do bi hêvî û bawerî faşîzmî qels bikerê, Tirkîya de îtîfaqê tewr hîrayî yê demokrasî awan bikerê û têkoşînê xo ser bivisnê.

Sey partîya Meclîsî ya hîrêyîne senî ke ma nêverda rejîm turê yewinî de ser bikewo, ma qerardar ê ke turê diyînî de nê rejîmî bin bivisnê. Prosesê weçînayîşî nêqedîyayo. Ma bêhêvî nêbê. Ma eşkenê nê cehenemî biqedînê. Firsend destê ma de yo ke ma turê diyînî de netîceyêka bêhempa û destpêkêkê neweyî bivisnê destî.

Şarê ma yê welat û teberê welatî, rêxistinê ma, dostê ma ganî têkoşînê vera faşîzmî peyê weçînayîşan rê meverdê, turê diyînî de bêkêmasî raya xo bdê û lapatê peyênî bidê faşîzmî ro. Seba ma rexnedayîşo tewr pîl no bibo ke ma nê rejîmî bin bivisnê.''