HDPyî vera eşkerayîya Wezaretê Karanê Teberî yê Almanya ya serê dewaya qefilnayîşê HDPyî tewirê xo mojna ke eşkerayîya hukmatê Almanya de amebi vatene ''Ma hêvî kenê ke HDP mabênê xo û PKKyî de sînorêk rono.''

Hemserekanê HDPyî Pervîne Buldan û Mîthat Sancarî  Wezîrê Karanê Teberî yê Almanya Heiko Maasî rê mektubêke erşawite û îfade kerd ke vateyê 'mabênê xo û PKKyî de sînorêk ronê' hetê dewleta tirke ra seba krîmînalîzekerdişê kurdan yeno şuxilnayene û goreyê erjanê Yewîya Ewropa nîyo.

Mektube hemserekan ard ziwan ke verî zî HEP, DEP, HADEP, DTP zî pê heman sebeban ameyî qefilnayene la Mehkemeya Heqanê Merdiman a Ewropa bire daye ke Tirkîya heqê nê partîyan binpay kerdî.

Hemserekan da zanayene ke ê nêzdîbîyayîşêkê winasênî qetî qebul nêkerê. Hemserekanê HDPyî birê MHME, Meclîsê Parlamenteran ê Konseya Ewropa, Parlamentoya Ewropa, raporê Komîsyonê Venedîkî vist vîrî û eşkera kerd ke sûcdarî û kerdişê vera HDPyî bêbinge yê.