Endama Komîteya Merkezî ya PKKyî Hêlîne Umît cewab da persanê Medya-Haber TVyî û rojdem ercna. Qiseykerdişê Hêlîne Umît ra  tay noqtayê girîngî wina yê:

''Ez xoverdayîşê Îmraliyî yê Rayber Apoyî selam kena. 69 wayîranê Nobele seba azadîya Rayber Apoyî mektubêke nuşta. 50 serrî verî Kurdîstan de qirkerdiş ameyêne kerdene la çewî vengê xo nêkerdêne. Ewro wayîrê Nobele vera tecrîdî vejîyenê. Ganî çew verê sîstemê qirkerdiş û tecrîdî de bêveng nêmano. Rayberê ma 25 serrî yo tecrîdkerde yo. Ganî her cayê dinya de şarê ma û merdimê bînî vejîyiê waran û vengê xo berz bikerê.

Hetê bînî ra Neteweyanê Yewbîyayeyan (NY) zî pare kerd ke ganî Rayber Apo bieşko avûkatanê xo bivîno. Rayberê ma qasê 10 serrî yo avûkatanê xo nêvîneno. Raşta zî Îmrali de rejîmêko taybet est o. Bi sîstemê tecrîdî vera şarê ma zî îşkenceyo psîkolojîk yeno kerdene. Coka raporê NYyî yê serê Îmraliyî zî girîng o. CPT dezgehêkê Ewropa yo la israr keno ke heta Tirkîya nêwaza ê nêeşkenê raporanê xo eşkera bikerê.

Vakurê Kurdîstanî de seba azadîya Rayber Apoyî çalakîyê girîngî yenê kerdene. La ganî nê çalakîyî bizêdîyê. Ganî vera tecrîdî xoverdayîşê Vakurî vejîyo asta serewedaritişî. Sere de şarê ma yê Vakurî ganî pêro şarê ma yê Kurdîstanî û teberê welatî bi ruhê tebaxe bibê sey Egîdan û têkoşînê xo aver berê.

Herêmanê Pawitişî yê Medya de vera îşxalê dewleta tirke xoverdayîşê gerîlayan xurt o. 3yê tebaxe ra nata hêrişê dewleta tirke bi ardimê PDKyî giran bîyî. Dewleta tirke Başûr her roje dana bombayan ver. PDK keno ke gerîlayan bigêro binê ablûqa. PDKyî estbîyayîşê xo bazarîya vera kurdan ser o nayo ro. Dewleta tirke Başûr de PKKyî xo rê kena bahane. Nîyetê ci no yo ke pêro Başûrî îşxal bikera. Dewleta tirke Kerkûk de kena ke bi destê DAÎŞî û Cepheyê Tirkmenan demografî bivurna. Dewleta tirke çendek  vaja ke armancê ci tasfîyeya PKKyî ya armancê ci qirkerdişê kurdan o.

Gerîlayî xora xoverdayîşêkê heybetînî kenê. Gerîlayî danê droneyanê çekdaran, helîkopteran û leşkeran ro. Gerîlayî teknolojîya artêşa îşxalkere bêtesîr kenê. 

Ez Fermanê 3yê Tebaxe  bi nefretî şermezar kena. Şingal de qirkerdişê na seserre yo  tewr pîl ame kerdene. La şarê ma yê êzidîyan nê Fermanê 74inî ra dersê pîlî zî girewtî. Şingalî paradîgmaya Rayber Apoyî ser o xo ver da û payan ser de mend. Têkoşîn û xoverdayîşê gerîlayan, YPJ û YPGyî  Şingal pawit. Ma dî ke o çax PDK senî Şingalî ra rema. La fermanî ra dima Şingal de xêrê xoverdayîşê gerîla û şerwanan ra ferasetê xopawitişî vejîya werte. Nika YBŞ, YJŞ û şar pawitişê Şingalî kenê.

Erdogan xelîfeyê DAÎŞî yo. Şingalî ser o tehlukeyê hêrişanê DAÎŞî hema zî est o. Hetê bînî ra dewleta tirke Şingal tim dana bombayan ver. Ganî netîceyê ke fermanî ra vejîyayê wa hol bêrê famkerdene. Ganî şarê Şingalî goreyê tehlukeyanê muxtemelan xo rêxistin bikero.

Sîstemê şerê taybetî yê Tirkîya keno ke îradeyê şarî bişikno û merdiman cuya rûmetêne ra dûrî bifîno. Vakurê Kurdîstanî de atmosferêko xirab est o.  Tîya de hem şer est o hem zî kerdişê şerê taybetî. Şarê ma yê Vakurî tim vat PKK şar o, şar tîya de yo. Wa şarê ma zî dostê ma zî gêrayîşê govende rê dewam bikerê û nîşaneya serkewtişî bimojnê. Wa deyîrê xo yê kurdkî vajê û tim vajê 'Bijî Serok Apo.' Çew nêeşkeno nînan asteng bikero.

Ez biranê îdamî yê dewleta Îranî şermezar kena û embazan Pexşane Ezîzî û Şerîfe Muhammedî bi heskerdişî selam kena. Dewleta Îranî çalakîyanê 'Jin, Jiyan, Azadî' ra tersena. Îran hinî do nêeşka bi îdam, kiştiş û qirkerdişan verê xoverdayîşî bigêro, cinîyan ê azadîwazan vindarno û îradeyê komelî çin bikero. Wa dewleta Îranî biranê îdamî ra abigêro.''