Hukmatê Almanya karê newekerdişê tankanê Leopard 2 dayêne Tirkîya. Hêrişanê Tirkîya yê vera Efrînî ra dima Almanya dabi zanayene ke înan no kar vindarnayo.

La goreyê cigêrayîşê bernameyê 'Report Munchenî' yê kovara Sternî yê Almanya vet werte ke newekerdişê tankanê Leoprad 2 fîrmayanê bînan a Rheinmetallî ser o dewam keno. Goreyê doneyanê şîrkeya çekan a Rheinmetallî û hukmatê Almanya Tirkîya rê parçeyê tankan nêroşîyenê. La doneyê cigêrayîşî eqsê ney vanê.

Cigêrayîş de nê zanayîşî estê:

Dewleta tirke 2019 de parçeyê neweyî yê Leopard 2 dayî şinasnayene û nê parçeyî manenê parçeyanê şîrketa IBD Deisenrothî ya Bonnî. Rheinmetall 2007 de na şîrkete hêrînabî. Serra 2018 de zî heman fîrma xeylêk sîstemî rotî dezgehêkê artêşa tirke.

Hukmatê Almanya vernîyazê ke derheqê na babete de dîyayî pê bahaneya 'sirê dewlete' bêcewab verdayî. Muxalefetî waşt ke hemkarîya bi Tirkîya ganî bêra eşkerakerdene. Parlamentera Partîya Çepe Sevîme Dagdelenî ard ziwan ke Almanya bi nê hawayî îşxalê vera Rojawanî yê Tirkîya rê hemkarîye kena. Parlamentera Partîya Keskan Tobiase Linder zî venga hukmatê Almanya da ke Tirkîya tankê xo senî newe kerdê wa eşkera bikero.