Hemşaredara Gimgimî Gulbahare Kaya ANFyî rê qalê xebatan û projeyanê înan kerd. 

Gulbahare vist vîrî ke wextê qeyûmî de qeza rê xizmetêk zî nêameyo kerdene û budçeya şaredarîye seba personelanê qeyûmî ameya xerckerdene. Gulbahare da zanayene ke xizanîye û çinbîyayîşê budçe ra ciwanî koçê teberê welatî kenê û vat: ''Ma wazenê projeyê 'Ez wazena cayo ke tede dadîya xo ra bîya de mird biba' bivisnê dewre û bi nê hawayî Gimgimî ra koçkerdişî vindarnê.''

Gulbahare pare kerd ke binawanîya qeza mîyanê halêkê xirabî de ya û vat: ''Rayîrî nêvirazîyayê, awa gemarine luleyanê awa şimitişî ra yena. Zaf cayî est ê ke pabeyê xizmetî yê. Ma wazenê projeyanê xo bîyarê ca, merdiman zî tewrê xebatanê xo bikerê. Hetê bînî ra xeylêk merdimî est ê ke sey personelan asenê la rixmo ke karêkî zî nêkenê meaşî gênê. Seba ke peymana înan est a ma nêeşkenê nika nînan karî ra vejê. Eke ma wina bikerê ganî ma tazmînatî bidê. Seba ney zî budçeya ma çin a. Qeyûm şîyo la hema zî meseleyê ci dewam kenê.''

Gulbahare îfade kerd ke ê do seba cinî û ciwanan zî xeylêk xebatan bikerê û Merkezê Cinîyan ê Savûşka û Merkezê Kulturî yê Mordemî newe ra înan aktîf kerdê.

Gulbahare ard ziwan ke seba Gimgimî xeylêk projeyê înan est ê la îmkanê înan ê budçe zaf çin ê. Gulbahare vat: ''Cografyaya ma polîtîkayanê şerî ra ameye xalîkerdene, bêkarîye asta tewr berze de ya, ciwanê ma verê xo danê Ewropa. Ma planê kenê ke kooperatîfan awan bikerê û bi nê hawayî verê xizanîye bigêrê.''