Bazirganî û qeçaxtîya merdiman a ke serê Belarusî de ke menganê hamnanî de dest pêkerde, rojanê peyênan de rojdemê Yewîya Ewropa de ya. Koçberê ke zêdêr kurd ê, pê hemkarîya îqtîdarê Lukaşenkoyî ameyî berdene bi Belarusî û serê sînorî de vera dîyayî. Teşrîna verêne ra nata 30 hezar koçberî derbazê sînoranê Yewîya Ewropa bîyî. 7 hezar koçberî zî bi rayîrê qeçaxçîtîye Belarusî ra resayî Almanya.

''Şima ma de reyde semedê seyahatê Belarusî amade yê? Pasaportê xo bîyarê çîyê bînî ma rê verde''

Netîceya hemkarîya hukmatê Belarusî de îqtîdaranê AKP û PDKyî wextêkê xurtî de hende koçberî resnayî Ewropa.

Goreyê cigêrayîşanê ANFyî xeylêk acentayê turîzmî şaristanê Hewlêrî yê Başûrê Kurdîstanî de bi hemkarî û kontrolê PDKyî qeçaxçîtîya merdiman kenê. Destûr dîya nê acenteyan ke medyaya dîjîtale ser o bi eşkerayî reklamê qeçaxçîtîya merdiman bikerê.

Kesê ke muracatê nê acentayan kenê pê hemkarîya PDK û AKPyî pasaport gênê. Semedo ke temsîlkarîya fermî ya Belarusî Başûrê Kurdîstanî û Iraq de çin a vîzeyê koçberîye Tirkîya de yeno amadekerdene.

''Konsolosxaneyê Sûrîye yê Îstanbulî de pasaportê Sûrîye zereyê 48 saetan vejîyeno''

Acentayê Hewlêrî semedê şarê Rojawanî û Sûrîye zî pasaportan amade kenê. Acentayî medyaya dîjîtale de wina reklam kenê: ''Konsolosxaneyê Sûrîye yê Îstanbulî de pasaportê şima 48 saetan de amade yo.'' No reklam zî eşkera keno ke Esad zî mîyanê karî de yo. Balkêş o koçberê Rojawanî ke resenê Ewropa kampanê PDKyî de manenê.

Ciwano ke şaristanê Dêrikî yê Rojawanî ra yo û 17 serre yo ANFyî rê qala maceraya xo ya koçberîye kerde. Ciwanî pare kerd ke dima ke o keyeyê xo reyde kampa mabênê Zaxo û Dihokî de mendo pê hetkarîya PDKyî bê pasaportî derbazê Îstanbulî bi. Ciwanî da zanayene ke o nika kampêka eyaletê Brandenburgî yê Almanya de maneno. Ciwanî îfade kerd ke o Îstanbulî ra pê teyara derbazê şaristanê Minskî yê Belarusî bîyo uca ra zî binê çimdarîya polîsan de pê otobuse ameyo berdene bi sînorê Polonya.

''Semedê Belarusî girewtişê vîze zaf rehet o, têna pasaportê xo bigerê bêrê''

Medya û dezgehê muxalîfî yê Belarusî pê dokumentan eşkera kenê ke mîyanê hukmatê Lukaşenkoyî de yewinêke qeçaxçîtîya merdiman kena. Na yewine koçberan rê formê muracatî virazena, teyarayan ra pêşwazî kena, pê otobuse koçberan bena serê sînorî.

Goreyê dezgehê çapemenîye yê muxalîfî 'kyky.org' şîrketê Belarusî qeçaxçîtîya merdiman ra rojane 75 hezar euro qezenç kenê. Heman keyepelî nameyê nê 12 acentayan eşkera kerdî û televîzyonê Belsatî yê Polonya zî eşkera kerd ke nê şîrketan ra 'Oscar Tour' û 'Vizak' hemwelatîyanê Iraqî û Başûrî rê ameyî rotene. 

Yeno vatene ke xebatkarê nê wird şîrketan eşkenê karanê teyara yê koçberan safî bikerê. Belsat TVyî pare kerd ke teyarayan de 6-7 açarnayoxê kurdkî û erebkî xebitîyenê.

''Şima  ma reyde semedê seyahatê Belarusî amede yê?''

Medyayêka muxalîfe ya bîne Nexta TVyî dîmenê koçberan Minsk de weşanayî. Dîmenan de aseno ke koçberî mîyanê bazarî de yenê çarnayene û kesêk zî bi kurdkî vano ''Metersê, nê polîsê Belarusî yê, guleyan erzenê hewayî.''

Yewîya Ewropa vera bazirganîya merdiman a dewleta tirke û PDKyî têgêrena. Yewîya Ewropa verî seferê teyarayan ê Hewlêr,Bexdadî-Minskî betal kerdî û Rayîrê Hewayî yê Tirkan (THY) zî bi xurtî hişyar kerdî.

Sereka Komîsyonê Yewîya Ewropa Ursula von der Leyen Ajansê Xeberan ê Almanya (DPA) rê qisey kerd û vat ke ê vera na bazirganîye zêdêr bixebitê. Serekê Koma Partîya Şarî ya Ewropa Manfred Weberî zî waşt ke bi hawayêkê cidîyî Erdogan bêro hîşyarkerdene. Weberî vat: ''Eke Erdogan seferê koçberan keno û bi nê hawayî Yewîya Ewropa rê şantaj keno ganî bi hawayêkê eşkerayî cewabê ci bêro dayene.''