Rojnameyê almanî Bildî pare kerd ke koçberkerdişê kurdan ê ver bi Belarusî karê rejîmê Erdoganî yo. Goreyê selahîyetdaranê polîsanê sînorî yê Almanya koçberî pê seferanê taybetan ê THYyî semedê Minskî rê erşawîyayî.
Hamnanî ra naya sînorê mabênê Belarusî û endama Yewîya Ewropa Polonya de dramê multecîyan esto. Nê koçberî zêdêr Başûr û Rojawanê Kurdîstanî ra yê. Bi hezaran koçberî pê rayîrê teyarayan resayî paytextê Belarusî Minskî û semedo ke xo biresnê Almanya û welatanê bînan ê Ewropa serê sînorê Polonya de yê. La dima ke pê paştdayîşê Ewropa sînorê Polonya ame qefilnayene koçberî zî warê daristanan de mendî.
Rojnameyanê serekeyan ê Almanya ra Bildî da zanayene ke peyê nê trafîkê koçberan de Serekkomarê Belarusî Aleksandr Lukaşenko û Serekdewletê Rûsya Vilademir Putinî reyde Serekkomarê Tirkîya Erdogan zî esto.
Rojnameyî îfade kerd ke 3 lîderî zî koçberan sey çeke vera ambargoyê Yewîya Ewropa şuxilnenê.
Serekê Sendîkaya Polîsan a Almanya Heiko Teggatzî rojnameyî rê qisey kerd û da zanayene ke koçberî pê teyarayanê Rayîranê Hewayî yê Tirkan (THY) û hetê Aeroflotî ra ameyî sewqkerdene. Goreyê xebere semedê sewqê koçberan hûmara seferanê teyarayan ver bi Rojhelatê Mîyanênî û Minskî zimistanê 2019-20î de 17 bîyî la nê zimistanî de bîyî 57 seferî. Nê seferî zî şaristanê Hewlêrî yê Başûrê Kurdîstanî ra û Şamî ra zêdîyayî.
Merkezê komkerdişê koçberan ra 2 merkezê girîngî Îstanbul û Moskova yê. THYyî hûmara seferanê Îstanbul-Minskî roje de kerdî di reyî. Şîrketa hewayî ya Belarusî Belavia zî hewte de 4 seferî kerdî.
Rejîmê Erdoganî pê hemkarîya Rûsya û Belarusî hem koçberan sey çeke vera Yewîya Ewropa şuxilneno hem zî Başûr û Rojawanê Kurdîstanî keno veng. Nê koçberî herêmanê Behdînan û Silêmanî yê Başûrê Kurdîstanî ra yê.
Dîya zanayene ke koçberî Hewlêrî ra derbazê Îstanbulî, uca ra zî derbazê Belarusî bîyî. Balkêş o no planê vengkerdişê Başûrî hêrişanê îşxalî ra dima kewt dewre.Goreyê doneyanê fermîyan mîyanê serra peyêne de nêzdîyê 40 hezar hemwelatîyê Iraqî remayî teberê welatî. Nînan ra 10 kesî merdî, aqîbetê 12 kesan zî nêzanîyeno.
Koçberan vizêr çalakîya rayraşîyayîşî kerde û waşt ke berê sînorî abibê. Îdareyê Polonya zî 12 hezar hêzê çekdarî zêdînayî û tedbîrê xurtî girewtî. Şert û mercanê hewayî û cuye ra heta nika tewr tay 10 multecîyî merdî.
