Fermanê AKPyî ser o heqê memnûyî yê Hemşaredarê Wanî Abdullah Zeydanî ameybî îadekerdene. Bire xeylêk şaristanan de yena protestokerdene.

Hemşaredaranê Wanî Zeydan û Neslîhane Şedal zî verê Rêxistina DEM Partî ya Wanî de eşkerayîyêke daye. 

Zeydanî îfade kerd ke vera ey û îradeyê şarî bêhuqûqîye yena kerdene û vat: ''Vera îradeyê şarê ma dafikêke ronîyaye. Eşkera yo ke na bira xespkerdişî hetê AKPyî ra ameya dayene. Heqê ma yê îtîrazkerdişî est o. Tîya de mesele şexsê ma nîya. Mesele îradeyê şarê ma yo. Pêro kesî wa vera bêhuqûqîye wurzê payan ser. Oyo ke ewro ma rê yeno kerdene, siba do Îzmîr de zî bêro kerdene.''

Zeydanî venga namzedê AKPyî zî da û vat: ''Ti do senî îradeyê şarî binpay bikerî û ê kursuyî de ronişî? Şarê ma ney qebul nêkeno.''

Şedale zî ard ziwan ke vera înan darbeyêka sîyasîye ameya kerdene û vat: ''Ma ancî dîyar kenê ke ma do vera  ney bibê wayîrê tewirî û çîyo ke ma ra ameyo xespkerdene apey bigêrê. Şarê Wanî mojna ke ê vera na bire payan ser de yê û wayîrê îradeyê xo vejîyê.''