Hemserekanê Şaredarîya Bajarê Pîlî ya Wanî Neslîhane Şedal û Abdullah Zeydanî bi merasîmêkî wezîfe dewr girewt. Hemşaredarê Wanî yo verên Mustafa Avciyo ke wezîfeyê ci amebi xespkerdene o zî tewrê merasîmî bi.

Merasîm de verî Hemsereka DEM Partî ya bajarî Gulşene Kurt qisey kerd. Gulşene Kurd bale ante ser ke înan 14 heme şaredarîyê Wanî zî girewtî û vat şarê Wanî reyna îrade û xoverdayîşê xo mojna ra û tarîx nuşt.

Musatafa Avci zî bale ante xoverdayîşê şarê Wanî ser û vat: ''Şarê Wanî xoverdayîşo pîl da û ser kewt. Înan heme bêhuqûqîye û xîleyî kerdî yewna berî abikerê la şarê man o ber da rîyê înan ro, qefilna. Hinî nêeşkenî wina rehet tîya qeyûm ca bikerê.''

Abdullah Zeydanî zî nê vatî: ''Şarê ma çirey qeyûm qebul nêkerd û tim paştî daye partîya xo. Ma 14 şaredarîyê xo qeyûmî ra xelisnayî kerdî şaredarîyê şarî. Na keda şarê ma ya. Ma do şaredarîyanê xo şarê xo reyde îdare bikerê û dest pê xizmetî bikerê. Xora ma hewceyê tecrubeyê embazanê xo yê bînan zî yê.''

Neslîhane Şedal zî bale ante muhîmîya xoverdayîşê şarî ser û nê vatî: ''Qet çîyêk îradeyê şarî ra girdêr nîyo û çew nêeşkeno ey xesp bikero.  Şarê ma bo têkoşînî ser kewt ke no zî mojneno ke îradeyê ci senî gird o. Ma têkoşînê azadîye û demokrasîyî de bedelê girdî dayî. Ma pêrune bi rêzdarî yad kenê, ma do têkoşînê înan bidê domnayene. Serkewtiş ê şarê Wanî yo.''