Hetkarê Hemserekanê HDPyî yê Komîsyonê Heqanê Merdiman ra Berpirsîyar Umît Dede yî derheqê binpaykerdişê heqanê zîndanan de eşkerayîye daye.

Dedeyî vat: ''Hemşaredara Colêmergî Dîleke Hatîpogluya ke 16 mengî wezîfeyê hemşaredarîye kerd pê hukmkerdişê dozgeranê cemaatî lezabez cezaya 16 serran û 3 mengan dîyaye ci û na ceza hetê mehkemeya berze ra ameye tesdîqkerdene.

 Hatîpoglu gama ke Zîdanê Sîncanî ra sewqê Zîndanê Wanî bîye  dekewtişê zîndanî de raştê îşkenceyî ameye. Rixmo ke hetê cendirmeyan ra zîndanê biasyîşî ra yena ci rê cigêrayîşo rut ame ferzkerdene. Îşkenceyo ke 12ê menge de qewimîyayo ma vizêr eşnawit û ma ewro a zîyaret kerde. Bi vatişê aye gardîyanan waşt ke wa kincanê xo vejo. Dîleke Hatîpoglu zî no tewiro bêehleq û bianor qebul nêkerd. Seba ke a vera cigêrayîşê zitî vejîyaya hetê hîrê gardîyanan ra cayo ke tede kamera çînê de bi îşkencekerdişî ameye  şelênayene.

Ma bi serran o zanê ke zîndanan de cigêrayîşo rut esto. Bitaybetî rojanê ravêrteyan de Wekîlê ma birêz Omer Faruk Gergerliogluyî na  babete arde rojdem. Cigêrayîşo ruto ke 2016 de pê îdarekarîya înfazî kewt dewre 2020î de pê îmzayê Erdoganî îdarekarîye de cayê xo yo hîra girewt.

Cigêrayîşo rut  teberê wîjdan û ehleqî de yo meşru nîyo. Eke şima vanê cigêrayîşo rut çîn o qey qanûnê înfazî rê hukum best pa?

Serkewekîla Gruba AKPyî Ozleme Zengîn îdîa kena a avûkat û pawitoxê heqanê merdiman a. Ez tîya ra venga ci dana derbê îşkenceyî hema bedenê Dîleke Hatîpoglu de esenê. Ozleme Zengîn wa sey avûkatêke şirê aye  zîyaret birkere û wa vînî cigêrayîşo rut  est yan çîn o. Cigêrayîşo zit esto, mexdura ci ya peyên zî Dîleke Hatîpoglu ya.

Hatîpolu de nêweşîye sey vertigo û bursitî estê ke wird nêweşî zî hîşê merdimî danê têmîyan rê ke çew nêeşkeno xo ser vindero û rayra şiro. Ma mudirê dîyinî yê zîndanî de pêvînayîş kerd. Mudir senî ke bîyeqûnî bikero ard ziwan ke seba Hatîpoglu hîrê gardîyanî derb kerdî derheqê aye de cipêrsayîş dîyayo destpêkerdene.

Wezîrîya Edaletî ganî na eşkerayîya ma sey pêhesnayîşê sucî bîgiro dest.

Hem zere de hem teber de caardişê bêhuqûqîye dewam kenê. Vera nayî avûkat û dezgehê komelê sîvîlî yê cesur zî estê. Xora ê zî do Dîleke Hatîpoglu zîyaret bikerê û raporanê xo eşkera bikerê.

Xora şima zanê grevê vêşanîye zîndanan de dewam keno. Grev vera na neheqîye sey cigêrayîşê rutî  û binpaykerdişê heqanê bînan yeno kerdene. Ganî waştişê tepişteyan cade bêrê caardene. Tecrîdê 22 serran ê Îmraliyî semedê heme zîndanan tehdît o. Coka ganî tecrîd bêro wedaritene. Sebebê problemanê zîndanan tecrîdê Îmraliyî yo. Ma veng dane ke hema dejê pîlêr nêameye antene wa nê caardişê ezîyetê ke hukmat binê nameyê asayîşê welatî de keno, bêrê qedînayene.''