Seba ke wekîlê HDPyî yê Kocaelî Omer Faruk Gergerlîogluyî da eşawitene ke 30 wendakarê unîversîte Asayîşê Uşakî raştê cigêrayîşê rutî ameyî  û na mesela  fînaye rojdemê meclîsî, derheqê ci de tehqîtat dîya destpêkerdene.

Walîya Uşakî Funda Karabiyikî vera naye eşekrayîye daye, cigêrayîşo rut red kerd û vat ê do vera Gergerlîogluyî pêhesnayîşê sûcî bikerê. Walîtîye herindan hukmkerdişê îşkencekerdoxan de êyê ke raştê îşkenceyî ameyî,  hedef girewtî.

Serekwekîla Grûba AKPyî Ozlem Zengîna ke derheqê mesele de Euronewsî rê qisey kerd îdîa kerd ke Tirkîya de qetî cigêrayîşo rut çîn o û Gergerlîoglu bi terorîzekerdişê meclîsî sûcdar kerd.

Serekwekîla Grûba HDPyî Merale Daniş Beştaşa ke waşt wa Zengîne Gergerlîogluyî ra ozrê xo biwazo vat: ''Raporanê fermîyan ê ke hetê Komîsyonê Heqanê Merdiman ra ameyî amadekerdene de zîndanê Bakirkoy, Xarpêt, Sîncan de cigêrayîşo rut esto. Ez hîrê zî nameyan bidê Aslihan Gencay, Elîf Kaya, Sadîye Eser hîrê heme zî rut ameyî cigêrayêne. Êyê ke vera nayî gerre zî kenê bi xo yenê cezakerdene. Vatişê cigêrayîşo rut esto de keyfa şima nîno la cigêrayîşo rut esto. Cigêrayîşo rut îşkence yo, vera merdimîye sûc o îqtîdar nê sûcî bi hawayê sîstematîk keno.''

Nayî ser o Wekîlê AKPyî yê Denîzlî Cahît Ozkanî  waşt ke wa pê belgeyan cigêrayîşo rut bêro îspatkerdene.

Wekîla HDPyî ya Îstanbulî Huda Kaya vera ey vejîyayî û wina persayî: ''Belgeyê cigêrayîşê rutî beno? Cigêrayîşê rutî verê kamayan de nêbenê.

Merale Daniş Beştaş zî vat belgeyî xora raporê zîndanan ê ke tede yeno vatoke ke cigêrayîşo rut esto.

Bado ke mesele hîna bîye pîle cinîyê ke raştê cigêrayîşê rutî ameyî medayaya sosyale de derheqê mesele de çîyê ke ciwîyayî pare kerdî. Mesajan de ame vatene ke înan bi xo dîyo û eşkerayo ke Tirkîya de cigêrayîşo rut esto û ame waştene ke wa Zengîne ozrê xo biwazo.

Meclîsê Cinîyan ê HDPyî zî bi eşkerayîyêke da zanayene ke ê do vera îşkenceyê cigêrayîşê rutî bêveng memanê û veng da Wezîrîya Edaletî, îqtîdar û selahîyetdaran ke wa wa cadê nê îşkenceyî biqedenê.