Hemsereka  Komeleyanê  Elewîyan ê Demokratîkan (DAD) Kadrîye Dogan bi wesîleya serrgêra 31. ya Qirkerdişê Sêwasî ANFyî rê qisey kerd.

Dogane vîstvîrî ke 14ê êlula 2023yî de seba ke zaf wext sero ravîyarte dewaya qirkerdişî ameye qefilnayene û vat: ''Sûcê ke vera merdimîye bîyî, wextê înan denêbeno. Qirkerdişê Sêwasî sûcê vera merdimîye yo û dewleta ke roja verêne ra kiştoxan pawena, hemkarê nê sûcî ya. Seba ke elewîyan waşt bi nasname û bawerîya xo nê welat de  bicîwîyê, ameyî hedefgirewtene. Tirkîya de teberê nasnameyê tirkî û bawerîya sunîtîye de  nasnameyê bînî nînê naskerdene û tim raştê polîtîkayanê înkar û qirkerdişî yenê. Rixmê heme hêrişan elewîyî tim virar şinê bawerîye û kulturê xo û bi têkoşînî mîyanê qirkerdişanî ra vejîyenê. Qirkerdişê Koçgorî, Dêrsim, Çorum, Mereş de zaf dejê pîlî ameyî antene la elewîyan birînê xo pîştî û payra mendî.

Gama ke Qirkerdişê Sêwasî ame kerdene, dewî ameyênî vengkerdene û vêşnayene û kiştişê ke kiştoxê ci nimeteyî ameyênî kerdene. 90yan de heme hetî rêxistinkerde vengê xo vetêne. Dewlete seba ke verê nê bîgêro dest pê qirkerdişan, kiştiş û suîkastan kerd. Bi qirkerdişan waşt komelî bikero lete, têna biverdo. Dewlete no verî zî kerd. Bi Qirkerdişê Mereşî ame waştene ke verê kurdan û elewîyan bêro girewtene. Qirkerdişo ke bi xo kerd 12ê Êlule zî kerd sebebê nê. Bi Qirkerdişê Madimakî zî ame waştene ke reyna elewîyan çîn bikerê. Kerd ke bi dejî têna biverdo. Waşt ke wa elewîyî bi hêzanê dmeokrasîyî û kurdan merê têhet.

Nika zî vera elewîyan 'qirkerdişo sipî' yeno kerdene. Êyê ke elewî nîyê elewîyan pênas kenê. Bi nameyê elewîyan kesê ke elewî nîyî binê serbanê Wezîrîya Kulturî de dîyanêtê elewîyan pê anê û  nê sero yeno waştene ke serê bawerî û qirseyî de bibê wayîrê qale. Cemxaneyê ke bi keda pîle ameyî ronayene çend kesê ke pabesteyê înan ê ca kerdê ke naye sero kontrol bikerê. Warê perwerdeyî pêro  bîyo cayê dînî. Dersê dînî yê bizorî yenê dayene. Elewîyî tim raştê zextê dewlete yenê. Ma bawerîya xo bi têkoşînî heta ewro arde. Dezgehê elewîyan xîret kenê, mecbûrê zî xîret bikerî. Ganî elewîyî bibê yew û têkoşînî xurtêr bikerê. Ma bi serran o hemwelatîya seyyewbînîye wazenê û têkoşînê ma yê hemwelatîya seyyewbînîye do dewam bikero. No têkoşînêko topyekun o.''