Hemsereka Konfederasyonê Sendîkayanê Kedkaranê Umûmîye (KESK) Şukrane Kablan Yeşîl derheqê tesîrê ekonomî yê serê kedkaran de ANFyî rê qisey kerd.

Yeşîle vist vîrî ke soz dîyayo kedkaranê umûmîye ke meaşê înan goreyê dowîzî bêro weşkerdene û meaşo tewr şenik do bibo 22 hezar lîra. Yeşîle vat: ''Îqtîdar samîmî nîyo. Nika meaşo tewr kêm karmendîye de 11 hezar û 700 lîra yo. Ame vatene ke meaş do bizêdîyo la babete nêameye berdene bi Meclîsî. Yeno vatene ke meaşo tewr şenik do bibo 22 hezar lîra. La xora nika enflasyonî ra no pere rew ra helîya şi. Her ke şino hêzê ma yê hêrînayîşî kêmîyeno, sîstemê bacan zor dano karmendan. Krîzo ekonomîk tewr verî dano karmendan ro.''

Hemsereka KESKî Şukrane Kablan Yeşîl îfade kerd ke hînî yew manaya ci çin a ke meaşê karmanden bibo 22 hezar lîra. Yeşîle vat: ''Goreyê ma ganî meaşo tewr şenik ganî serê sînorê xizanîye de bibo. Ma wazenê ke pêro konfederasyonê karmendîye ney xo rê esas bikerê û bi nê hawayî şorê masaya muzakere. Şert û mercê cuye vera benê zehmetî û pê têkoşînî her çî raşt beno. Coka ma venga kedkaranê umûmîye danê ke wa têkoşînî pîl bikerê.''