Hemserekanê Pêroyî yê  DEM Partî Tulaye Hatimogullari û Tuncer Bakirhanî  Hemsereka Pêroyî ya HDPî ya verêne Fîgenê Yuksekdag Zîndanê Kandira yê Kocaelî de  zîyaret kerd.

Gama ke hemserekan Fîgene Yuksekdag rede pêvînayîş kerdêne verê zîndanî de qirse ke ame pêser qerarê Dewaya Kobanê bi slogananê  “bijî berxwedana zindanan” protesto kerdî. Hemserekan badê pêvînayîşî verê zîndanî de eşkerayîye daye.

Tulaye Hatimogullari ard ziwan ke moralê embazanê înan ê ke ceza dîyaye ci zaf ca de yo nê vatî: “Rewşa hemsereka ma ya pêroyî zaf hol a. Moral û motîvasyon berz o. Semedê paştdayîşî her kesî rê spas kerd.  Fîgena sînayîye zaf zelal wina vat. Bi nê qerarî yeno waştene ke paştdayîş û têkoşîno hempar bêro mehkumkerdene. Ma zî nê wina vînenî. Xora roja verêne ra ma vanê Dewaya Kobanê dewaya kumpas û qesasî ya.  Ame waştene ke ruhê têkoşîn û paştdayîşî yê vera DAÎŞî bêro cezakerdene. Senî ke Fîgena sînayîye zî vat ma do nê paştayîşî û têkoşînê azadîye bidomnê. ” 

Tuncer Bakirhanî zî nê vatî:  “Xora ma semedê moraldayîşî nêşîyî. Fîgene hemraya ma erjîyayîye ya. Ma zanê Fîgene senî cinîya şorişgêre û sosyalîste ya. Ma qala prosesî kerd, prosesê verê xo erjna. Biney moral girewt. Hêz girewt. Raşta zî moral da ma. No proses nêqedîya. Senî ke  sereka ma Fîgene sey cinîya soyalîste vera barbaranê DAÎŞî paştî daye Kobanê ma zî do sey kurdan, cinî, şorişgêr û ciwanan paştî bidê embazanê xo yê zîndan de yê. No muhakemekerdiş hema nêqedîyayo. Şarê ma do bi têkoşînî nê betal bikero. Înanê ke  bi îdîayanê vengan û madeyê ke çîn ê vanê qey ceza daya embazanê ma wa bizanê ke ma do bi têkoşînê dahînî girdî cewabê înan bidê û embazanê xo bikerê azad. ”