Hasbî Çakici û Huseyîn Yildiz, nizdîyê 3 mengî yo ke bajarê Den Haagî yê Hollanda de hemverê tecrîdî de grevê vêşanîye de yê.

Her di xoverdayoxan ANF’yî rê qisey kerd û vat, hemverê mezgê qirkerdoxî de ganî Kurdî her cayan de xo ver bidê û vengê xo berz kerê.

Peyamê her di çalakwanan wina yê:

Çakici: Ganî Ma Vengê Leyla Guvene Hîna Bikerê Berz

Hasbî Çakici: Hemrayî Leyla Guvene û Nasir Yagizî dest bi na hemle kerd û ma zî tewrê ci bîyî. 86 rojî yo ma bajarê Den Haagî yê Hollanda de grevê vêşanîye de yê.

Tu problemêkê min ê weşîye çino. Bêguman dejê sereyi esto ke o zî normal o. Labelê problemêkê min o giran çino. Ma veng danê şarê Kurdî, merdimîye û her kesî ke bi mesuldarîye nizd bibê. 7 hezarî ra vêşêr hemrayê ma zîndanan de, Ewropa de û her cayê dinya de xeylî embazê ma grevê vêşanîye de yê. Hemverê mezgê faşist û qirkerdoxî yê îqtîdarê nikayênî de ganî şarê ma her ca de vengê xo bikero berz. Ganî ma vengê hemraya xo Leyla berz kerê.

Waştişê ma no yo, mayê tepişteyan ercê ma yê tewr pîroz ê. Her roje rayîr gênê, bi faksan û çalakîyanê cîyayan domananê xo rê wayîr vejênê û şexsê înan de heme domananê Kurdan rê wayîr vejênê. Ganî ma paştî bidê înan. Tecrîd do raste ra bêro wedaritene, faşîzm do bêro rijnayene û şaro Kurd do azad bibo.

Yildiz: Ganî Bala Ma Mucadeleyî Ser o Bo

Huseyîn Yildiz: 19’ê Çele ra ma bajarê Den Haagî yê Hollanda de grevê vêşanîye de yê. Hetê bedenî ra tayê problemî virazênê. La ganî bala ma mucadeleyî ser o bo, ke na yewe moralê kesî kena zêde. Tewirê embaze Leyla, tewirê Nasir Yagizî û tewirê azadîye yê 7 hezarî tepişteyan ê zîndanan, ma hîna keno xurt. Ez heme çalakwanan rê serkewtiş wazena, hurmetê xo pêşkêş kena.

Ma tim vat, na hemle xeylî pîl a, hemleya fînalî ya û şerto tekane yê serkewtişê hemle zî o yo ke hêzê demokratîkî û şar bibê perçeyêkê na hemleye û xoverdayîşê azadîye pratîk de ramojnê. Gama ke ma no kerd xurt, hendî tu sebeb nêmaneno ke serkewtiş nêro destfînayene.

Bi hêzê 8’ê Adare, Newroze û sîleya ke 31’ê Adare de pirodîya faşîzmê AKP-MHP’yî ro ma zanê ke şaro Kurd do 1’ê Gulane de û dimayê ci ra giranîye bido serê mucadeleyî. Ez her kesê xoverdayoxî silam kena, hurmetê xo pêşkêş kena.