Hasan Ûmût Ozero ke Zîndanê Karabukî yê Tîpê T’yî de yo, 1’ê Adare ra nata hemverê tecrîdkerdişê Rayberê Şarê Kurdî Abdullah Ocalanî de grevê vêşanîye de yo. Ozerî bi rayîrê telefonî keyeyê xo dir qisey kerd û seba mesuldarîye veng da. Ozero ke qezaya Licê ya Amedî de ameyo dinya Temmuz a 2011’î de ame tepiştene û bi waştişê cezaya girane ya zîndanî ame ‘muhakemekerdene’.

Ozerî 8 şehîdê ke çalakîya fedaîye kerde bi vîr ardî û vat, “8 embazanê ma yê ke çalakîya fedaîye kerde, peyamê ‘bêvengî merg o, xoverdayîş cuye ya’ da. Ma no peyam girewt. Bedelê c içi beno wa bibo ma do heta peynî xover bide û tecrîdî bişiknê. Ma sozê xo bica ard. 15 vilikanê azadîye dest bi rojeyê mergî kerd. Bêguman seba nê xoverdayîş û mucadeleyî ganî bedelî bibê.”

Sey heme peyrewanê nê xoverdayîşî, ma zî amade yê ke nê bedelî bidê û ma danê. Her kesî dî, 7 ewladanê Kurdan ê ke zîndanan de bî seba qedîyayîşê tecrîdî xo feda kerd. Wa dinya hemen ê bizano, tena 7 ganî nê, tepişteyê azadîye heme amade yê ke xo seba Rayber û şarê xo feda bikerê. Ma nêtersenê, wa şarê ma zî meterso. Oyo ke nika terseno dişmeno faşîst o.

Ozerî ard ziwan ke dişmen bin ê tersî hêrişê serê cenazeyan û mayan keno û vat, “Seba ke domanê înan biciwîyê mayî verê zîndanan de çalakîyan virazenê, la bi namerdîye hêrişê înan kenê. Tirêm her kes çira hemverê nê çîyan de bêveng o? Tirêm çewî dir wijdan nêmendo? Hêrişo namerd ê hemverê mayan ganî bibo sebebê serewedartişî. La çi heyf ke wijdanê merdimîye ewro kor, ker û lal o.”

Dişmen eşkeno hêrişê merdimanê ke xoverdayîşî rê wayîr vejênê bikero, eşkeno înan bitepşo zî. Şop û tesîrê nê heme çîyan raste ra wedarêno. Labelê şopa ke wijdan de manena,, ne yena girewtene û ne zî yena xovîrrakerdene. Tîya ra tepîya ganî her kes hesabê wijdan û exlaqî bikero. Wextê paştdayîşî hendî ravêrto. Wext wextê wayîrvejîyayîşê xoverdayîşê zîndanan o.”

Ozerî bitaybetî veng da ciwananê Kurdistanî û vat, “Tarîxê Kurdistanî de tewirêko pasîf ê ciwananê Kurdan o winayên nêameyo diyene. Ne Rayberî û ne zî şehîdî nê qebûl kenê. Ganî ciwanî tîya ra tepîya xo newe ra biercnê û bi şîyarê ‘Ma bi ciwanî dest pêkerd ma do bi ciwanî bi ser bikewê’ vejîyê meydanan.”

Ozerî peynîya qiseykerdişê xo de 1’ê Gulane Roşanê Karker û Kedkaran pîroz kerd û vat,, “Do çew nêeşko rojê ma tarî bikero.”