Dewleta tirke planê çalakîye de ke derheqê Rayberê Şarê Kurdî Abdullah Ocalanî de pêşkêşê Komîteya Wezîran a Konseya Ewropa (KMKE) kerdbi, reyna caardişê 'heqê hêvîye' red kerd.

Serekê Baroyê Amedî derheqê babete de ANFyî rê qisey kerd û vist vîrî ke Ocalanî rê 2000 de cezaya muebede ya girankerde dîyabî. Erenî vat: ''Mehkemeya Heqanê Merdiman a Ewropa (MHME) 2003 de bire daye ke cezaya muebede goreyê Peymana Heqanê Merdiman nîya û ganî çew heta peynî zîndan de nêmano. Tirkîya zî ganî goreyê biranê MKME û KMKE cezaya muebede ya girankerde canêyara. La Tirkîya goreyê biranê înan tênêgêrena. Ganî Tirkîya hem goreyê bira serê binpaykerdişî têbigêra hem zî mewzuatî bivurna.''

Erenî vat: ''Zîndanê Îmraliyî de herinda ke bira heqê hêvîye bêra caardene bi serran o pêvînayîşê bi keye û avûkatan nêno kerdene. Pêvînayîşê ke heqo bingeyî yo, yenê astengkerdene. Nê kerdişê xirabî yê. Yanî Îmrali de îzolasyon est o, têkilîya bi teberî yena birnayene. Pêvînayîşê bi keye û avûkatan bi bahaneyan yenê astengkerdene.''