Heyetê Şopnayîşê Grevê vêşanîye û Koordînasyonê Krîzî yê Marmarayî, raporê derheqê grevê vêşanîye Beşê Estenbolî yê Komela Heqan a Merdiman (ÎHD) de bi kombîyayîşêkê çapemenîye eşkera kerd. Kombîyayîşî de pankarta bi nuşteyê “Wa heqê huqûq û tibî yê çalakgeranê grevê vêşanîye bêro dayene” ameye akerdene.

Hemverxatoxa Kongreya Şaran a Demokratîk (HDK) û parlamentera HDP’yî ya Mûşî Gulîstan Kiliç Koçyîgîte, Sereka Beşê ÎHD’yî ya Estenbolî Gulseren Yolerî, Endamê Heyetê Odeya Doktoranê Estenbolî (ÎTO) Murat Ekmez, Avûkatanê Komeleya Huqûqnasan a Seba Azadîye (OHD) ra Rengîn Ergûle, Serekê Beşê Anatolîya yê Sendîkaya Kedkaranê Weşîye û Xizmetanê Sosyalî (SES) Erdal Guzel tewrê kombîyayşî bîyî û qiseykerdişêk kerd.

Dimayê qiseykerdişan raporo ke ameyo amadekerdene rayapêroyî reyde ame parkerdene. Raporo ke tarîxanê 26-31'ê Gulane genê xo zere de ame vatene, goreyê pêvînayîşê ke ameyê kerdene nêweşxaneyan de tu amadekerîye nêameye kerdene û ame vatene, heta ke Wezîrîye ferman nêdo, ê do tu amadekarîye zî nêkerê û Wezîrîye tu fermanêk nêdayo. Rapor de hetê bînî ra ame vatene, dimayê grevê vêşanîye yê demdergî eke çalakgerî nêrê tedawîkerdene, nêeşkê rast biwerê û bişemê, merg zî mîyan de rîsêkê zêde esto ke nêweşîyê giranî tepişteyan de peyda bibê û ganî na rewşe lezabez bêro famkerdene û amadekarîya ke hewca kena bêra kerdene. Înan waştişo ke Walî û selahîyetdaran reyde pêvînayîş bikerê, labelê cewab nêdayo waştişê înan, selahîyetdaran yan ê nêdîyê yan zî selahîyetdarê ke înan dîyê zî teyna goştarîya înan kerda. Dewamê ci de ame vatene, rixmo ke 6 rojî qedênayîşê grevê vêşanî ser o derbaz bîyê zî, bi kelepçeyan muayene yeno kerdene, bi rînge tepişteyan benê nêweşxane, revîrê nêweşxaneyî de tedawî yena kerdene û werdê ke ganî nêrê dayene danê ci. Tewr peynîye de ame vatene, xeylî tepişteyî nêameyê berdene bi nêweşxane, ewnîyaşê tibî yê rojane ameyo qedênayene. Teyna wexto ke nêweşîyê giranî qewemîyenê, bi destûrê rayberîya hepisxaneyî înan benê bi revîr.