Namzedê Hemserekîya Şaredarîya Farqînî yê DEM Partî Kadrî Esen 1989 de dewa Fera ya Farqînî de dadîya xo ra bîyo. Ey heta nê wextî DÎHA, Azadiya Welat, Xwebûn û Stêrk TV de rojnamegerîye kerde.

Esenî ANFyî rê qala weçînayîşan û armancanê înan kerde.

Esenî da zanayene ke meseleyê Farqînî zaf ê û ê do xîret bikerê ke şarî reyde şaredarîye îdare bikerê. Esenî vat: ''Ma projeyê xo amade kerdî. Seke zanîyeno wextê qedexeyanê tebervejîyayîşî yê 2015î de Farqîn de texrîbatêko pîl virazîyayo. Ma do nê texrîbatan çare bikerê. Ma 2019 de şaredarîye ancî qezenç kerdbî la qeyûmî dest nabi ser. Qeyûmî heta nika xizmetê şarê ma nêkerd. 

Farqîn şaristanêko qedîm o. Ma do goreyê tarîx û ekolojîya ci bixebitê. Ma do kooperatîfan awan bikerê, cinîyan rê waranê îstîhdamî abikerê, kargehan abikerê. Waranê kultur û ziwanî de zî projeyê ma est ê. Farqîn bi xo qezaya ziwanî ya. Şarê ma babeta ziwanî de hesas o coka ma goreyê ney xebatanê ziwanî bikerê. Ma do şarê xo de tim bi kurdkî qisey bikerê, tabelayanê xo bikerê kurdkî. 

AKP seba ke qeza de partîya ma ser nêkewa destê ci ra çi yeno keno. La şarê ma sindoqan de cewabê ci do bido. Her raya ke sindoqan rê veja do vera tecrîdê Îmraliyî û polîtîkayanê şerê taybetî biba cewab. Ma do nê rayan bimojnê îqtîdarî û vajê ke 'şar şima nêwazeno.' Şarê ma ganî bi nê ferasetî şoro serê sindoqan.''