Hêrişê sîstematîkî yê vera kurdkî

Vakurê Kurdîstanî de destsernayîşê şaredarîyanê HDPyî reyde hêrişê vera kurdkî bi hawayêkê sîstematîkî yenê kerdene. Tabelayan ra heta goran hêrişê vera erjanê kurdan zêdîyayî.

Îqtîdarê AKPyî dima ke bi qeyûman dest na şaredarîyanê HDPyî ser vera ziwanê kurdkî zî polîtîkaya qirkerdişî viste dewre.

Serra 2014î ra dima şaredarîyanê DBP û HDPyî dibistan û kreşê bi kurdkî akerdbî. Şarî zî bi xurtî paştî dabi nê xîretî.Dewleta tirk pê nê paştdayîşî qayîl nêbîya û sere de Wan, Agirî, Colemêrg, Bedlîs, Îdir û xeylêk şaredaran rê qeyûmî tayîn kerdî. Dewlete bi rayîrê qeyûman pêro çîyê bi nameyê kultur û ziwanî qedexe kerdî. Tabela û nîşanê bi kurdkî ameyî wedaritene, herinda înan de tabelayê erebkî nusîyayî.

Weçînayîşê 31ê adare ra dima bi waştişê Şaredarê AKPyî yê Bedlîsî Nasrullah Tanglayî tableyê kurdkî ameyî wedaritene. Îqtîdarê AKPyî verê cû zî Bedlîs de gorê tarîxnas û sîyasetmedarî Şerefxanê Bedlîsîyî û gorê endamanê keyeyê ey texrîb kerdî.

Serra 2019î de bînaya Şaredarîya Tetwanî ra tabelaya 'Şaredariya Tetwanê' wedarîyaye. Qeyûmê Payîzava zî tabeleya bi nuşteyê 'Bi xêr xatin, Welcome' wedarite û herinda ci de tabelaya bi farskî û tirkî darde bîye.

Serra 2016î de dima ke Şaredarîya Agirî rê qeyûm ame tayînkerdene Merkezê Kulturî yê Sema Yuca ame padayene ke bi kurdkî û îngilîzkî perwerde dayêne. Kreşê domanan ê Evdalê Zeynekê zî bi heman hewayî qefilîya û bînaya ci dîyaye Muftuyê Agirî.

Qeyûmê Bazîdî statuyê Ehmedê Xanîyî texrîb kerd û tabeleya ''Parka Çandê ya Ehmedî Xanî'' ameye texrîbkerdene.

AKPyî Wan de ke tede 500 hezar kurdî ciwîyenê kreşê kurdkî yê Perperokî yê Şaredarîya HDPyî qefilna. Şaristan de xebatê kultur û hunerî yê ke bi kurdkî ameyêne kerdene  bi destê qeyûman ameyî vindartene. Tabelayê bi kurdkî yê şaristanî hema zî hedefê AKPyî de yê. 

Wekîlê verênî yê HDPyî Lezgîn Botanî pare kerd ke  qeyûm nameyo newe yê polîtîkayanê vera kurdan o û vat: ''No qirkerdişê kulturî îlanê asîmîlekerdişê kurdan o. Wezîfeyo verên ê qeyûman asîmîlekerdişê kurdan bi.''

Serekê verênî yê KURDÎ-DERo ke hetê dewleta tirke ra qefilîya, Îsmaîl Aşkanî  ard ziwan ke dewlete seba asîmîlekerdişê kurdan mîyar dolaran xerc kena û vat: ''Polîtîkaya asîmîlasyonî ya dewlete vera kurdan ser nêkewte. Netîceya nê nêzdîbîyayîşê dewlete de 100 serrî yo ke welat de  şer dewam keno. ''

Açarnayox û mamostayê kurdkî Osman Koşutî da zanayene ke AKP temsîlkarê faşîzm û kolonyalîzm o û vat: ''Dewlete û îqtîdar wazenê têkoşîn û roşnvîrîya kurdan bifatisnê. Ganî ma cuye û tradîsyonê Kurdîstanî ra tawîz nêdê, her ca de polîtîkayanê asîmîlasyonî deşîfre bikerê.''