Komîteya Merkezî ya Doktoranê Sudanî da zanayene ke herişê vera çalakîya roniştişî de tewr kêmî 35 kesî merdî û bi seyan kesî zî bî birîndar.

Dimayo ke dîktatorîye hetê têgêrayîşê şarî ra amebî rijnayene Konseya Eskerîye dest naybî serê rayberîye û hêrişê şarî kerdîbî. Yewîya Ewropa, DYE û Brîtanyaya Girde no hêriş şermezar kerdibi.

Artêşa Sudanî dimayê hêrişkerdişê çalakîya roniştişî, heme peymanê ke heta nika ameyê kerdene betal kerdî û da zanayene ke mîyanê 9 mengan de weçînayîşêko newe do bêro kerdene.

General El Bûrhanî soz da ke ê do derheqê qirkerdişê roja Dişemeyî de cipersayîş bidê destpêkerdene. Generalî red kerd ke bi hawayê zorî înan çalakîya roniştişî vila kerda.

Mabênê Têgêrayîşê Azadîye û Bedilîyayîşî û Konseya Vîyartişî ya Eskerîye de, derheqê tayê qanûnan de peymane amebî îmzakerdene labelê derheqê têhetameyîşî de têserekerdiş nêamebi kerdene.

Têgêrayîşê Azadîye û Bedilîyayîşî dimayê nê hêrişan vengdayîşê çalakîyanê roniştişî kerdibi û têkilîyê xo yê bi Konseya Eskerîye qut kerdîbî.