Hêrişê vera banê DEM Partî yê Bêrecûkî xeylêk bajaran de ame protestokerdene.

Riha de wekîlê DEM Partî Salîha Aydenîz û Zeynepe Oduncu zî tede bi seyan kesan verê Şaredarîya Bêrecûkî de eşkerayîye daye. Çalakîye de ke polîsan kerd ke asteng bikero, slogana "Şaredarî ya şarî ya, do wina bimano. " ameye eştene.

Endamê Meclîsê Şaredarîya DEM Partî ya Hakan Ariciyî vat: "Her çiqas vajê nasnameyê înan bewlî nîyo zî, ma zanê ke hetê leyminê ke hêrişê ma kenê kam ê. No zîhnîyeto ke bi bayraqe û posteran rîyê xo yê leyminî nimeno wa hole bizano ke ne hêrişî ne zî polîtîkayê tarîkerdişî eşkenê ma rayîrê ma ra bikerî. Ma do wayîrê îradeyê şarê Birecûkî yê 31ê adare bivejîyê.’’ 

Hakan Ariciyî wîna dewam kerd: "Şarî raya xo nêdaye Begîrî, daye DEM Partî. Sakip Yaşar, Reşît Çerikan, Mahmut Dirier ê ke tewrê xeta xayînîye ya Begîtî bîyî wa nê hole bizanê ke; tarîx do çirey xayînîye û xayînan xo vîra mekero. Şima wîjdanê nê şarî de sûcdar ê. Helêke cuwa ver mîyanê kayê leyminî ra vejîyê ke şima bieşkê bivejîyê mîyanê şarî. Begit wa helekê cuwa ver serekîya ke xesp kerda, îradeyê şarî bikerî û şarî ra ozrê xo biwazo. Qet hêzêk nêeşkeno ma dewaya ma ya heqdarî ra raqilno. Begît mecbûro ke îstîfa bikero. Ma bi anorê xo est ê, bi têkoşînî pîl benê. Ma nêtersenê, tîya de yê.” 

Salîha Aydenîz zî veng da Begîtî ke wa cade îstîfa bikero û vat: "Nê îqtîdarî di dewrî nêeşka bi qeyûmî îradeyê şarî xesp bikero. Coka bi polîtîkaya şerê taybetî wazeno xesp bikero. Na polîtîkaya qeyûmî ya. Begît û çeteyê ke tira paştî geno nêeşkenê ma bitersnê. Ma do provokasyonanê înan rê mexapîyê û sîyasetê xo yê demokratîkî xurtêr bikerê. Wa Wezîrîya Karanê Zereyî û Wezîrîya Edaletî wezîfeyê xo bîyarê ca.” 

Çalakîye bi slogananê "Begîto dizd wa îstîfa bikero" qedîyaye. Dima ra wekîlan û hemşaredaran esnaf zîyaret kerd. Badê zîyaretê esnafî bi seyan kesan bi sloganan ver bi banê DEM Partî yê qeza rayra şîyî.

Amed,Wan û Êlih de zî hêrişê vera DEM Partî yê Bêrecûkî ame protestokerdene.