Polîsanê tirkanê ke serê sibayî ra Merkezê Pêroyî yê HDPyî girewt binê ablûqa newe ra hêrişê partîyijan kerd. Polîsan mesafeyo nêzdî ra pê gazê îsotî hêriş kerd.

Endamê Heyetê Rayberdişî yê Merkezê HDPyî Veli Saçilik, Îdarekarê HDPyî yê Anqara Huseyin Gokoglu, Endamê Meclîsê Partîye yê HDPyî Ali Ozkan û Îdarkarê HDPyî yê Yenimahale Nazim Karakurt zî tede 6 kesî ameyî destbendkerdene.

Vervatoxa HDPyî Ebru Gunay vera polîsan vejîyayî û vat ''heqê şima çîn o ke şima banê partîya îşxal kenê''. Naye ser o polîsan gazê îsotî eşt rîyê Gunaye. Polîsê ke gaz eşt vat ''îşxal wina beno''. Şarî pê slogana ''HDP şar o, şar tîya de yo'' vera polîsan vejîya. Polîsan pê gazê îsotî hêriş kerd, nengî çînayî, heqerat û tehdîtî kerdî.