Hemverê tecrîdê serê Rayberê  Şarê Kurdî Abdullah Ocalanî de çalakîyî zêdîyene.

Hemsereka KCDyî û parlamentera HDPyî ya Colemêrgî Leyla Guvena ke esîr yena tepiştene, çalakîya aye ya grevê vêşanîye kewte roja xo ya 22ine. Dimayê çalakîya Guvene ke seba wedartişê tecrîdê serê Rayberê Şarê Kurdî Abdullah Ocalanî dabî destpêkerdene, tepişteyanê PKK û PAJKîyan zî 27ê Teşrîna peyêne ra dima dest bi grevê vêşanîye yê biagêrayîş-bêdemî kerd.     

PARLAMENTERÎ ZÎ DO TEWRÊ CI BIBÊ

Parlamenterê HDPyî zî mîyan de xeylî kesî do rojanê 2, 3 û 4ê Kanûne de Stenbol, Enqere û Mersîn de, rojanê 7, 8 û 9ê Kanûne de zî Mûş, Şirnex û Mêrdîn de çalakîya grevê vêşanîye ya bi 3 rojan virazê.

Seba paştîdayîşê Guvene verî zî Edene, Riha, Wan, Amed û Colemêrg de grevê vêşanîye ameybî organîzekerdene û amebi vatene ke eke tecrîd nêro wedartene çalakî û aktîvîteyî do bêrê domnayene.