Bi amacê paştîdayîşê hemsereka KCDyî û parlamentera HDPyî Leyla Guvena ke esîr amîya girewtene û zîndan de semedê protestokerdişê tecrîdê serê Rayberê Şarê Kurdî Abdullah Ocalanî dest bi grevê vêşanîye kerdibi Amed, Wan, Colemêrg, Riha û Edene de grevê vêşanîye ameybî destpêkerdene.

Parlamentera HDPyî ya Amedî Dersîm Dage ke grevê  vêşanîye de ca gêna ard ziwan ke ê semedê wayîrvejîyayîşê çalakîya Leyla Guvene ke semedê wedartişê Ocalanî daya destpêkerdene kewtî grevê vêşanîye.

Dage qiseykerdişê xo rê wina dewam kerd: ‘‘No waştişê Guvene waştişê heme cinîyan ê kurdan o. Tecrîdê serê Birêz Ocalanî tena kesêk rê nê şarêk rê yeno kerdene. Ma sey şarê kurdî tim anê ziwan ke no tecrîd serê  kultur, ziwan û estbîyayîşê ma de yo û heta ke no tecrîd mero wedartene na herre huzûr nêvînena. Semedê aşîtî ganî tecrîdê serê Birêz Ocalanî bêro wedartene. Coka ma paştî danî Guvene û heta wedartişê tecrîdî do çalakîyê ma dewam bikerî.‘‘

Hemsereka HDPyî ya Amedî Fîlîz Bulutekîne zî bale ante tecrîdê serê Ocalanî ser û va: ‘‘Bi tecrîdî tena Birêz Ocalanî rê nê heme şarê kurdî rê hêriş yeno kerdene. Ma tecrîdî qebûl nêkenê û pey ser game nêerzenê.‘‘

Hemserekê HDPyî yê qeza Yenîşehîrî ya Amedî Vahap Gunayî zî tecrîdê Îmralî rê hêrsê xo ard ziwan û  va: ‘‘Semedê qedînayîşê hêrişanê serê şarê kurdî ma dest bi na çalakîye kerde û ma do bi çalakîyanê cîya- cîyayan rayîrê xo rê dewam bikerê.‘‘

Delegeyanê KCDyî ra Dîyadîn Noyanî zî bale ante polîtîkaya qirkerdişî ya hukmatî ser û va: ‘‘Kam ke înan ra nîyo tepişênî erzenî nezaret. Akademîsyen, emegdar, dewij, sîyasetmedar her kesî rê muameleyê sucdarî kenî. Bi taybetî zî hêrişê sîyasetmedaranê kurdan kenî.  Ma ewro bi na çalakîya xo vera nê pêrune de vindenî.‘‘