Heyetê Îmraliyî yê DEM Partî ke Îmrali de di reyî Rayber Apoyî reyde pêvînayîş kerdî na çarçewe de Başûrê Kurdîstanî de pêvînayîşan keno. Heyetê Îmraliyî ewro Neçîrvan Barzanî reyde ame têhet. Pêvînayîş ofîsê Barzanîyî yê Hewlêrî de ame kerdene.

Pîya bi endamanê Heyetê Îmrlaiyî Pervîne Buldan û Sirri Sureyya Onder, Hemserekê Pêroyî yê DBPyî Keskîn Bayindir, Buroyê Huqûqî yê Asrinî ra Ozgur Erol û Îbrahîm Bîlmez, Hemvervatoxê Komîsyonê Tekîlîyanê Teberî yê DEM Partî Berdan Ozturk, parlamenterî Gulcane Kaçmaz Sayyigit û Mehmet Kamaç tewrê pêvînayîşanê Başûrê Kurdîstanî bîyî.

Heyetî 16ê sibate de pêvînayîşê xo yo verên Serekê PDKyî Mesûd Barzanî reyde kerdbi.

Keskîn Bayindirî ke badê pêvînayîşî Konaxê Walîtîye de bi nameyê heyetî eşkerayîye daye, Walîlê Hewlêrî Omed Xoşnawî rê spas kerd.

Goreyê Ajansê Mezopotamya Bayindirî nê vatî: ''Pêvînayîşê ma yê bi Serek Mesûd Barzanî hendê saetêke û 45 deqayan dewam kerd. Ma hem mesajê Bizêr Ocalanî hem zî selamê ey teqdîm kerdî. Ewro zî ma Serekê Herêma Kurdîstanî Nerçîrvan Barzanî reyde pêvînayîş kerd.  Birêz Ocalan fîkranê Mesûd Barzanî û Neçirvan Barzanîyî muhîm vîneno.''

Bayindirî ard ziwan ke înan pêvînayîşan de derheqê ameyoxê kurdan de qisey kerd û nê vatî: ''Çareserî û haştîye senî benê, rolê aktoran ê kurdan nê prosesî de genî senî bî, ma nînan ser qisey kerd. Şarê kurdî û şarê Rojhelatê Mîyanênî pawenê ke meseleya kurdan wa bi metodanê demokratîkan bêro çareserkerdene. Çareserkerdişê meseleya kurdan do Tirkîya û Rojhelatê Mîyanênî de tesîro pozîtîf bikero. Meseleya kurdan hinî meseleyêka mîyanneteweyî ya. Heme hêzê dinya derheqê çareserkerdişê meseleya kurdan de qisey kenê. Rolo tewr gird zî yê aktoran ê kurdan o. Birêz Ocalanî semedê çareserî înîsîyatîfo gird girewt xo ser.''

Bayindirî wina dewam kerd: ''Birêz Mesûd Barzanî paştdayîşo gird da, vat o do paştî bido prosesî. Di rojî yo ma Hewlêr de yê, ma di pêvînayîşê muhîmî kerdî û wird pêvînayîşî zî hol ravêrtî. Netîceyê nê pêvînayîşan têna semedê kurdan nê semedê ameyoxê şaranê Rojhaletê Mîyanênî zî muhîm ê. Şarê ma çareserî wazeno. Aktorê kurdî, heme dezgeh û sazgehê kurdan bingeyê neteweyî de nizdîyê na mesele benê. Paştdayîşê xo îfade kenê. Heyetê ma Hewlêr de zîyaretê xo qedînayî, ma do şirê Silêmanî. Ma do Bafil  Talabanî û Kubat Talabanî reyde pêvînayîşan bikerê. Badê nê pêvînayîşan do eşkerayîya nuştekîye bêro dayene. Ma bi nameyê Heyetê Îmraliyî semedê pêvînayîşanê bi Mesûd  Barzanî û Neçirvan Barzanî spas kenê.''