Heyeto ke çimdaranê Bask, Katalan, Galîsî û Spanya ra ameyêne pê, seba ke weçînayîşanê 14ê gulane teqîb bikero amebi Tirkîya û Vakurê Kurdîstanî. Heyetî derheqê çimdarîya xo de eşkerayîyêke daye. Eşkerayîye de dîya zanayene ke şarê kurdî raştê zulmêkê sîstematîkî yeno kerdene, hetê rejîmê Erdoganî ra yeno waştene ke HDP bêro qefilnayene û weçînayîşan de zî înan pê çimanê xo tedaya polîsanê tirkan dîya.

Eşkerayîya ke hetê partîyanê sîyasîyan ê sey Podemos, Esquerra Republicana, Ebhildu û CUPî ra dîyaya wina ya:

''Şarê kurdî şaranê tewr qerebalixan ê Rojhelatê Mîyanênî ra yew o. Pêro tarîx de no şar raştê zulm û qirkerdişê îqtîdaran ameyo. Îqtîdarê Recep Tayyîp Erdoganî zî bi hawayêkê sîstematîkî zulmê kurdan kerd, wekîlê HDPyî tepiştî û vera HDPyî dewaya qefilnayîşî akerde. Netîceya ney de HDPyî zî bire daye ke lîsteyanê Partîya Çep a Keske ra bikewo weçînayîşan. 

Ma sey heyetêkî seba çimdarîya weçînayîşanê 14ê gulane şîyî Sêrtî. Sey heyetî ma armanc kerdêne ke roja weçînayîşî belge bikerê la hetê polîsan ra îfadeyê ma ame girewtene, bi saetan nezaretê qereqolî de tepişîyayî û neçare mendî ke welatî ra vejîyê.

Xûlasa Vakurê Kurdîstanî û temamîya Tirkîya binê îqtîdarê otorîtr û zorbazî de yê. Ma hêvîdar ê ke turo diyîn ê 28ê gulane do bivurno.''